KUCHING: Komiti Penyangga Penusah Ngenyit Nengeri (JPBN) Sarawak sehari tu ngaga pemutus ngetuka timpuh Atur Mindah Betagang Diterit (PKPD) ba Kampung Haji Baki laban nadai ngerikod kes baru pengudah diperesa kedua kali.

Chairman iya, Datuk Amar Douglas Uggah Embas madahka pengawa ngetuka timpuh PKPD ba Kampung Haji Baki laban nadai bukti nunjukka kes nya agi ngerekai ba dia.

Pia mega ku Uggah, Sarawak ngerikod lapan kes baru positif Covid-19 iya nya tujuh ba Kuching enggau siti kes ba Lawas ngujungka kes nambah 1,019.

Ku iya, bisi tujuh kes udah diperesa ba Kuching laban bisi kontak semak enggau kes positif ti udah diripotka sebedau tu lalu semua kes tu udah beperesa ba klinik pengerai nengah pengawa nyidi kontak.

“Kes ke-1,012 nya siku laki enggau kontak ngagai kes ke-1,010 enggau kes ke- 1,013 nya apai enggau bisi kontak semak ngagai kes ke-916.

“Kes ke-1,014, 1,015 enggau 1,016 nya bini enggau anak ke bisi kontak semak enggau kes ke-986.

“Kes ke-1,017 enggau 1,018 nya bini sereta siku anak sereta bisi kontak semak enggau kes ke-899.

“Kes ke-1,013 nya kes baru ke bisi kontak semak enggau siku kes positif dalam Kluster Greenhill seraya kes ke-1,017 enggau 1,018 nya kes baru ke bisi kontak semak enggau kes positif dalam Kluster Wisma Saberkas,” terang Uggah.

Nambahka nya ku iya, semua kes udah dipasuk ba wad isolasyen ba Sepital Besai Sarawak (SGH) ungkup atur bukai lalu pengawa nyidi kontak bukai benung dipejalai.

Uggah madahka Pelilih Lawas ngerikod siti kes iya nya kes ke-1,019 nya siku lelaki peranak menua baru pulai ari Sabah kena 7 Oktober tu tadi.

Terang iya, lelaki nya diau ba Sabah kenyau ari pun bulan June laban gawa nyadi salesman ba kedai gari di Kota Kinabalu enggau pulai ke Sarawak nengah ICQS Merapok.

“Iya udah dikuarantin pengelama 14 hari pengudah datai ba Lawas lalu udah dipasuk ba wad isolasyen Sepital Miri ungkup atur bukai,” ku Uggah.