BETONG: Tuai Rumah (TR) Denil Anak Ranti, 58 ari rumah panjai Menyalin Baru meransang sida serumah besabar betapi enggau Atur Mindah Betagang Dipekul (PKPD) kedua ti baru digerah.
PKPD keterubah ba rumah panjai iya nya kena 12 ngagai 25 March suba lalu PKPD kedua berengkah 2 nyentuk 16 September tu.
Nya alai, Denil ngelalau sida serumah nagang diri ari ngulu bilik pangan diri dikena nagang Covid 19 ti majak ngerekai.
“Anang enda ngasika Atur Standard Pengawa (SOP) ti udah ditetapka perintah sekumbang timpuh PKPD tu,” ku Denil.
Nangkan ke nya, Denil madah PKPD serak tu sida bisi kurang agi penangi enti dibandingka enggau keterubah suba laban udah bisi peneleba.
“Taja pia, penanggul ke besai ke ditapi lebuh maya diasuh bepekul (PKPD) tu iya nya pengawa di kebun enda ulih dikereja lalu ngujungka sinu meda mayuh utai tanam mati tauka luluh.
“Sida ke gawa begaji hari mega balat amat tejanggal penatai pemisi nadai nadai ulih nurun gawa.
“Nya alai, aku ngelalau kami serumah anang ngambi mudah ba senentang pengerai lalu sama besampi minta penusah Covid-19 badu ngerekai,” ku iya.
Udah nya, Denil meri besai terima kasih ngagai bantu barang pemakai ti bisi dianjung raban ari Opis Pengintu Pengelantang Pendiau Raban Bansa (JKM) Pampang Betong nyadika bekal sida serumah sekumbang timpuh PKPD.
Denil mega madah atur nagang orang luar tama ngagai rumah panjai sida mengkang dipejalaika baka ngelama tu.
Rumah panjai Menyalin Baru bisi 24 pintu bilik nyengkaum sida ti ngentak nyembuah bela diasuh bepekul sepengelama dua minggu.
