SIMANGGANG: Parti Keadilan Rakyat (PKR) Pampang Sri Aman majak timpang pengudah sekeda kaban komiti iya ningkilka diri ari parti ketegal asa enggau ketuai ti puntan mutarka penyarut dalam parti nya.
Yen Jebeni udah ngemaduka diri mangku pengawa nyadi Ketuai Pampang, ditu sehari tu tadi.
Entara bala bukai ti ngemaduka diri iya nya Ketuai Indu Pampang Patricia Limau Pantau, Ketuai Raban Nembiak Keadilan (AMK) Lawrence Temba sereta kaban komiti bukai.
Ku sida, pemutus ngemaduka diri mangku pengawa nya digaga pengudah berasai chukup asa enggau ketuai parti ti puntan mutarka penyarut dalam parti ke lama udah nyadi.
“Penyarut tu ngujungka parti nya timpang enggau pambar baka ke benung nyadi diatu.
“Ukai semina kami aja, tang mayuh penyukung Sapit Ketuai Pampang Sri Aman Norina Umoi Utot ti mega ex-chalun PKR lebuh Pengawa Bepilih Besai ke-14 )PRU14) mega deka ningkilka diri ari parti nya,” ku iya meri penerang.
Terang iya, mayuh kaban pampang protem PKR Sri Aman mega madahka asa pengudah Kaunsil Supreme Nengeri (MPN) diatu nadai diiring Baru Bian agi.
Taja ngelama tu iya nyadi tiang rayat negika tanah Adat Bansa Asal (NCR).
Yen meri selamat neruska pengawa ngagai bala bukai ti agi mengkang begulai enggau PKR.
Nitihka konstitusyen parti, PKR Pampang Sri Aman deka dipegai Sapit Ketuai Pampang Jubri Atak.
Ba lansa bukai, Tr Nyalu Tampa begulai enggau penyukung iya mega ngaga pemutus ningkilka diri ari Pampang Pati PKR Danau Melikin B, Balai Ringin.
