Poh Lian mujur ngeluar sayur chara moden

KUCHING: Sapit Kepala Menteri Datuk Douglas Uggah nemuai ngagai palan ngumpul, proses enggau mungkus (CPPC), siti ari palan pemansut asil sayur bedaun pemadu besai Sarawak, Poh Lian Vegetable Sdn Bhd, di Batu 13 Jalai Kuching-Serian, kemari.

Tuju pengawa nemuai nya ku iya, laban deka belajar ari kompeni nya ba chara ngumpul, proses sereta mungkus sayur ari kebun nya.

“Kompeni ti ngembuan setipikit MYGAP tu ngepunka operasyen sida ba taun 2000, lalu mansutka urung 4,000 kilogram tiap ari nengah 28 bengkah kebun di Jalai Mamat Satu.

“Poh Lian tu siti kompeni ti mansang nengah teknologi moden,” ku iya.

Iya madah pemujur Poh Lian tu nunjukka Sarawak ulih mansang ngagai pengawa nengah chara eksport.

“Tu mega kebun model hidroponik lalu bisi kebun ikar semak enggau CPPC ti ulih dipansik bala usahawan kami,” ku iya.

Uggah ti mega Menteri Betanam Betupi Moden, Tanah Adat enggau Pemansang Kandang Menua nya madah opis iya benung dalam proses nambahka perengka guna ba CPPC ti baru digaga ba selampur menua.

“Tu ulih mantu sida ke ngereja pengawa betanam ba menua tu nyual lalu rian, sibau enggau ke ukai ngagai kompeni ti bisi ba palan ngumpul menua sida,” ku iya.

NERANG…Ng Song Khang enggau anak iya Louis meri penerang pasal operasyen CPPC ngagai Uggah enggau bala bukai.