SARIKEI: Premier Sarawak, Datuk Patinggi Tan Sri Abang Johari Tun Openg disadang datai bejadi Jematan Nanga Lasi diatur kena 9 Ogos tu.
Kaban Kunsil Nengeri (ADUN) Meluan, Rolland Duat Jubin madah, nya deka nyadi siti kelai pemujur dijapai perintah nengeri nyendiaka infrastruktur ungkup peranak menua pesisir.
Ku iya, jematan beungkus urung RM5 juta nya dikeandal meri pemaik ngagai lebih 1,500 peranak lalu nyadi projek penyambung ti dianti sida ti diau ba sitak menua ulu nya.
“Projek Jematan Nanga Lasi tu dua taun endur tembu lalu siti ari inisiatif Perintah Gempung Parti Sarawak (GPS) dikena nambahka pengelantang rayat menua pesisir.
“Jematan tu ukai semina nyambung genturung rumah peranak aja, tang ngemuntang pejalai ke sekula enggau klinik ti ngelama tu nengah jalai ai tauka jalai batang.
“Projek tu mai ubah besai ngagai pengidup peranak Nanga Lasi laban udah tu sida lantang mai asil kebun ke pasar, ti ulih nambah penatai pemisi enggau ekonomi sida,” ku iya.
Rolland nyebut pekara nya ngagai media pengudah ngetuai ke Aum Tuai Komuniti enggau Tuai Raban Bansa (KMKK) sitak Pakan ba Opis Pelilih Pakan, kemari.
Iya mega meransang semua KMKK nyengkaum tuai rumah ngambi sampal datai enggau meri sukung ngagai pengerami bejadi jematan nya ila kelai sida ngenang pemanah pengawa perintah nengeri.
Ku iya, kerejasama raban tuai renggat baruh chukup beguna dikena nentuka semua langgur pemansang dibai perintah ulih digaga enggau lanchar sereta meri empas timpuh panjai ngagai rayat.
“Perintah GPS enda kala ngelaungka kandang menua pesisir ari semua pemansang ngelama tu.
“Kitai deka terus mai mayuh agi projek pemansang nentuka rayat menua pesisir sama ampit ngasaika pemansang nengeri tu,” ku Rolland.
