BETONG: Premier Sarawak, Datuk Patinggi Tan Sri Abang Johari Tun Openg dipelaba deka datai ngagai Pasar Pusa bejadi Jematan Batang Saribas 1 kena 19 Julai tu.
Sapit Premier Sarawak, Datuk Amar Douglas Uggah Embas ti ngenuku pekara nya madah, program nya disadang berengkah ari pukul 10.30 pagi.
Ba program sebaka, ku iya, Abang Johari diripot deka ngelanchar Ejensi Pemansang Bagi Menua Betong (BDDA).
“Kitai ngasai endang patut iya (Premier) ngelanchar jematan beungkus RM375.5 juta tu enggau BDDA.
“Jematan 1.55 kilometer (km) pemanjai tu mujur ngamat juluk rayat ti udah nganti 60 taun infrastruktur ti meruan agi lalu diatu udah dibuka ngagai mensia mayuh,” ku iya.
Uggah mansutka jaku nya pengudah ngetuai aum program bejadi Jematan Saribas 1 enggau ngelanchar BDDA di Betong ditu, sehari tu.
Iya madah, BDDA siti ari semilan ejensi pemansang di kandang menua tu lalu ditumbuh ba bulan September 2022.
“Tu mih awak kitai patut madah ngagai rayat kelebih agi komuniti di Betong pasal pemansang ti mujur dijapai naka diatu,” ku iya.
Iya ti mega Menteri Pemansang Infrastruktur enggau Penyangkai Kapal ngaku pengawa ngaga jematan nya enggau agih belanja RM1.5 bilion ti diberi ngagai BDDA endang diaku rayat dia.
“BDDA mansang nyadi siti pelasar dikena ngamat juluk rayat ngambi ulih ngaul mayuh agi projek pemansang sereta pengidup ti meruan agi,” ku iya.
Nya alai, iya ngarap rayat Betong sampal datai ngerichahka agi pengawa ngelanchar nya ila
