KUCHING: Komiti Besai Pengawa Bepilih Besai (SPR) netapka 4 November ila nyadi haribulan ngundi ungkup Pengawa Bepilih Mit (PRK) DUN Jepak.

Seraya hari nganjung nama chalun kena 21 Oktober tu, hari ngundi tumu kena 31 Oktober enggau haribulan writ kena 25 September.

Sapit Chairman SPR, Dr. Azmi Sharom madah, timpuh bekimpin ditetapka 14 hari berengkah pengudah ngenukuka chalun ti bediri minta pilih kena 21 Oktober nyentuk pukul 11.59 malam, 3 November.

“Ungkup PRK DUN N.67 Jepak, Sarawak, Palan Nganjung Nama Chalun (PPC) enggau Palan Ngumpul Undi Rasmi (PPRU) ti dikena nya ba Balai Raya Kampung Jepak, Bintulu,” terang iya nengah sebengkah penerang pengudah Aum Khas SPR dikena netapka PRK DUN Jepak, ditu tadi.

Nambahka nya, ku iya, bisi 14 buah palan ngundi ti ngundan 45 palan ngundi/arung enggau siti palan ngundi tumu ti ngundan siti palan ngundi/ arung tumu deka dikena.

“Semua palan ngundi bisi 15 buah enggau 46 palan ngundi/arung,” ku iya seraya madahka PRK DUN Jepak begunaka agih belanja penyampau RM2 juta.