PRN: Dayak patut ‘ndi otin, ndi asong’

BAU: “Pengawa bepilih (PRN) deka datai aku nesau kitai Dayak sama ‘ndi otin, ndi asong’ (siti runding, siti ati),” ku Datuk Seri Micheal Manyin Jawong.

Iya ti mega Menteri Pelajar, Sains enggau Pansik Teknologi, Sarawak madah ngena enggau rambai jaku ngintu Gawai Dayak taun tu bansa Dayak kelebih agi bansa Bidayuh patut besatu ati napi pengawa bepilih enda lama agi.

“Munyi ti dipadah akau ngelama tu, hari Gawai diintu nyadi tanda uniti.

“Nya alai kitai ari uniti tu bepegai enggau komuniti sama teguh begulai, anang ngereja utai kediri,” ku iya.

Manyin munyi nya rambau nyadi temuai dipebasa Pengerami Gawai Dayak Renggat Pelilih Bau ba Balai Suarah Bau ditu, Hari Enam tu tadi.

Tambah iya, pengerami Gawai nyadi sebengkah chara ngelakuka raban bansa Dayak ngagai orang menua luar.

“Bansa Bidayuh meseti mansang enggau bansa Iban, Orang Ulu enggau bansa bukai ti bisi ba Sarawak.

“Anang ngerunding agenda diri empu tang berundingka komuniti bukai awakka raban bansa kitai bulih pegidup ti tampak jemah,” ku iya.

Kelimpah nya, iya madah enti raban bansa Dayak besatu pekaranya deka meri empas positif ngagai pemansang nengeri.

“Enti kitai maju dalam siti uniti enggau besatu, siti pekara deka nyadi iya nya pemansang deka lebih chakah digaga ba menua kitai,” ku iya.

Pengerami nya diperindang enggau ‘Nyigal Pinyambut’ (Tanda Selamat Datai), meri perais ngagai champion sukaneka, diperindang champion pekit nebah tawak enggau tanda tradisional bansa Bidayuh, mandangka pekayan fasyen enggau pengawa ‘nyigal, nguguoh enggau bilamak’ (nyeradak ai pengayu).

Sama datai ba pengerami nya Adun Tasik Biru Datuk Henry Harry Jinep, Adun Serembu Tuan Miro Simuh, raban komiti, ketuai kampung enggau peranak genturung pendiau.

MANAH…Mensia mayuh ti bisi datai berintai mandangka ngepan asal nyadika pengingat ngintu Gawai.-Gambar Ghazali Bujang