PRN Ke-12 besai reti ngagai rayat Sarawak

SIBU: Pengawa Bepilih Nengeri (PRN) Ke-12 tu besai reti ngagai rayat Sarawak laban ngaul politik entara parti bepelasarka Sarawak baka PBB, SUPP, PRS dan PDP enggau parti politik ari Semenanjung Malaysia.

Nya alai, Chairman SUPP Pampang Dudong Wong Ching Yong ngansak peranak ditu nyukung parti GPS ke datai ari parti menua ti beratka peminta enggau pekara diguna rayat Sarawak.

Iya madah penuduk asal Kunsil Nengeri (Dun) Dudong endang diempu Parti Sa’ati Rayat Sarawak (SUPP) kenyau ari berapa puluh taun ke udah.

“Sejarah sitak Dudong tu terang bendar nunjukka nyauka semua pengari rayat iya ari kaban Parti SUPP.

“Ambika banding, pengari rayat Dudong keterubah iya nya Kong Chung Siao ditangkan Jawan Empaling, Wilfred Kiroh, Datuk Dr Soon Choon Teck enggau Datuk Tiong Thai King (ex-Kaban Parti SUPP),” ku iya ngelansa.

Iya mansutka jaku nya rambau Pengerami Ketuai Begulai enggau Rayat sereta Pengawa Beperesa Pengerai diatur SUPP Pampang Dudong di Rumah Sumbang Maleh, Sungai Assan Tengah penyauh urung 57 kilometer ditu, kemari.

Sama datai Sapit Chairman Kaunsil Pelilih Meradong enggau Julau Danny Banjang ti ngarika Kaban Kunsil Nengeri (Adun) Meradong Datuk Ding Kuong Hing.