KUCHING: Gempung Parti Sarawak (GPS) ngirai 24 chalun baru ungkup Pengawa Bepilih Besai Nengeri (PRN-12).
Chairman GPS Datuk Patinggi Tan Sri Abang Johari Tun Openg madahka sida tu deka dilatih enggau dibai nitihka politik chara Sarawak.
“Kitai sama bela nemu rayat di Sarawak bisi pupu raban bansa enggau pengarap ke alai landskap politik ditu semina rayat Sarawak empu ti nemu.
“Ngena rambai jaku ‘Sarawak First’ kitai andalka pekara ekonomi digital enggau ngetanka rampa menua ulih dibai orang biak ngena chara sida empu,” ku iya.
Abang Johari bejaku munyi nya ba aum media pengudah Nyuaka Surat Nyiri Chalun GPS di Indu Opis Parti Pesaka Bumiputera Bersatu (PBB) ditu, lemai tadi.
Ku iya, nembiak baru ti dichalunka GPS tu beumur entara 30 ngagai 40 taun, ke alai chalun orang indu bisi ti beumur 32 enggau 33 taun.
“Aku pechaya semua rintai chalun tu ngembuan peneleba enggau ulih bejalaika tanggungpengawa ti manah ba sitak sida empu,” ku iya.
Entara chalun baru ti dibantaika tu nyengkaum anak niang ex-Kepala Menteri Pehin Sri Adenan Satem iya nya Azizul Annuar Adenan ti deka disabung ba Dun Tanjung Datu, Dayang Noorazah Awang Sohor ba Dun Lingga, anak menyadi niang Tan Sri Dr James Jemut Masing iya nya Nicholas Kudi Jantai ba Dun Baleh enggau ke bukai.
Berebak enggau nya, Kepala Menteri ke mega Chairman GPS madahka manifesto tim GPS deka dibantai kena 8 Disember tu.
