BINTULU: “Kitai (GPS) enda tau lenyau Tamin enggau Kakus ba pengawa bepilih ti deka datai (PRN12),” ku Sapit Kepala Menteri Datuk Amar Douglas Uggah Embas.
Iya mantai ke pekara tu lebuh bejadika Pengerami Makai Lemai Mantar Gawai Dayak ti diatur Raban Indu Parti Pesaka Bumiputra Bersatu (PBB) sitak Kakus ensanus.
“Kitai udah lenyau sitak Selangau ba pengawa bepilih nyin kemari.
“Nya alai kitai sama besaup mantu Gabungan Parti Sarawak (GPS) ngetanka mayuh bengkah pekara enggau hak Sarawak baka kuasa imigresen, kuasa perintah nengeri enggau undang-undang,” ku iya.
Ku Uggah sitak Kakus ti dipegai Menteri Muda Undang-Undang enggau Adat Bumiputera Datuk John Sikie Tayai enggau sitak Tamin dua bagi sitak tu endang agi bisi penanggul beguna ke jalai alun, karan enggau bekal ai beresi.
Kelimpah nya, Uggah madah kaul GPS enggau perintah Pakatan Harapan (PH) ba Putrajaya agi manah enggau bekerejasama.
“Sida manah enggau berunding sentang isu ti beguna lalu aku empu deka ngaga komiti bejalaika projek perintah besai ba nengeri bekerejasama enggau Menteri Kerjaraya Baru Bian,” ku iya.
Pengudah nya iya meri geran RM30,000 ngagai PBB Kakus seraya John Sikie seduai Seketeri Besai GPS Datuk Alexander Nanta Linggi nambah RM10,000 enggau RM5,000.
Pengerami makai lemai nya mega ngatur Pekit Kumang Gawai ti ngangkatka Debby Allisandra Unyi nyadi champion mai pulai perais mata duit RM1,000.
Penuduk kedua enggau ketiga dipenggi Pretty Sophia Banting enggau Bibiana Jimbun mai pulai perais mata duit RM800 enggau RM500.
Perais pekit disuaka bini Datuk John Siki iya nya Datin Melia Bajok.
