MIRI: Bisi 133 penyereta ti ngaul bala nembiak, komuniti lokal, pengari ejensi perintah enggau perintah lokal ngerichahka agi program servis komuniti ti diatur di Taman Negara Niah empai lama.
Program nya diatur Institut Bemacham Biologi enggau Nyaga Rampa Menua (IBEC), Universiti Malaysia Sarawak (UNIMAS) nengah kerejasama Ejensi Kampung Sarawak (SFC).
Nya diatur serimbai pengerami ngintu genap taun keterubah pengawa ngaku Taman Negara Niah nyadi Taba Pesaka Dunya UNESCO.
Penyereta program mungkur bala nembiak ari empat sekula, tuai rumah, penghulu, kapitan, pengajar enggau staf perintah ti bekerejasama ngemujur program ti besulu ke jaku Begulai Nyaga Taman Negara Niah Nengah Sains Rayat.
Pengari pengatur ba sebengkah penerang madah, tuju program nya diatur mandang pangku pengawa aktif komuniti lokal ba pengawa nyaga rampa menua nengah pelasar sains rayat.
“Tu siti inisiatif ngempung institusyen akademik enggau komuniti lokal dikena negap pengeleda mensia mayuh ngagai pemesai guna nyaga biodiversiti enggau ekosistem pesaka menua.
“Pia mega, tu meri penerang ngagai komuniti pasal prinsip ekologi sereta pemaik ti diulih ari bemacham biologi tu ngagai mensia.
“Kelimpah narak penyayau enggau meri perati ngagai rampa menua, tu mega beguna amat dikena nentu pengaya biotik menua diguna ngena chara meruan sereta enda ngeruga rampa menua,” terang iya.
