LINGGA: Program pemansang ba sitak Kunsil Nengeri (DUN) Lingga deka terus diperati nitih peminta diatu nipak agih belanja ti disedia.
Kaban Kunsil Nengeri (ADUN) Lingga, Dayang Noorazah Awang Sohor madah, pemesai sitak Lingga nyadi entara kebuah besai ti begunaka langgur pemansang dipejalai berenggat enggau berurun.
Nya kebuah, iya meransang peranak nganjung perambu tauka peminta projek pemansang nengah Opis Pelilih nentuka nya diperunding enggau dipejalai berenggat.
“Ambi ke chunto, sekeda endur ba Stumbin kelebih agi Tanjung Bijat patut dikemanah ti deka dipejalai berenggat.
“Pekara nya deka terus diperati bepelasarka pekara ti patut dikemerat sereta agih belanja ti bisi diatu.
“Sama mega enggau langgur pejalai projek ba Gran Stumbin enggau projek engkelebat dikena nambah sistem penyambung sereta perengkaguna pemun ungkup peranak menua,” ku iya.
Dayang Noorazah nyebut jaku nya lebuh bejadi Pengerami Ngintu Gawai Dayak Renggat Pelilih Lingga ti diatur ba Balai Nangkai, ditu ensanus.
Ku Dayang Noorazah, pengerami ti richah diatur nya nyata mandangka semangat penyerakup enggau pengelantang rayat pupu bansa dia.
“Pengerami diatur di Balai Nangkai sekali tu mandangka atur baru nengah pengawa ngemanah infrastruktur balai nyengkaum nyendia sistem aircond enggau nukar pintu balai ungkup pengelantang penguna.
“Aku mega deka ngemendar agih belanja sepenyampau RM200,000 dikena bejalaika projek ngaga siti chapel taun baru dikena nyukung peminta komuniti menua,” terang iya.
Iya ngarap semangat Gawai Dayak deka terus nyadi penyungkak pengelantang, penyerakup enggau kerejasama entara rayat pupu bansa ti nyadi pengelebih endur nya.
Ngenang pmansang di Sri Aman, Dayang Noorazah madah ke bemacham inisiatif perintah ti dipejalai terus nunjukka asil positif enggau meri pemaik terus ngagai rayat.
“Empas ari pejalai mayuh projek enggau program pemansang nentuka mensia mayuh ngasai ke pemaik ti disedia sereta begulai ngasai ke pemaik pemansang ti meruan dipejalai,” terang iya.
Bela datai, Pegawai Khas Premier Sarawak, Datuk Helmi Hazmi; Pemangku Pegawai Pelilih Lingga, Josephson Louis Nako sereta bala Tuai Raban Bansa enggau Tuai Komuniti (KMKK). – OSMAN RAZALI
