SIBU: Program STEM50 dikena nambahka penyampau nembiak ngambi subjek Sains, Teknologi, Injiniring enggau Matematik (Stem) deka dilanchar ba Dun Nangka, bulan baru.

Pekara tu dipansutka Sapit Menteri Pelajar, Inovasyen enggau Pemansang Penau, Dr Annuar Rapaee pengudah bejadika Pengawa Nutup “Lab on STEM Package Enrolmnent”, Hari Dua tu tadi.

Iya ke mega Adun Nangka madah, program tu deka ngambi 150 iku nembiak Pom Satu nyadi ‘nembiak ambu’ ari tiga sekula sekondari di baruh sitak iya.

Tiga sekula sekondari tu iya nya Sekula Sekondari (SMK) Kampung Nangka, SMK Agama Sibu enggau SMK Jalan Oya.

“Aku deka ngambi 50 iku nembiak ambu ari genap sekula. Sida udah dikelala nengah peresa diagnostik diatur komiti betuaika pegawai opis pelajar pelilih Sibu enggau prinsipal.

“Sida ti dipilih ungkup program tu entara nembiak ke bisi penau dalam Stem.

“Sida deka diambi nyadi anak ambu nyentuk Pom Tiga laban pengudah datai ba Pom Empat, sida deka dibagi ngagai pelajar Sains enggau Sastera,” ku iya.

Dr Annuar madah, enti setaun iya ulih nerima 150 iku nembiak ambu, ba timpuh tiga taun ke deka datai, iya disadang manggai 450 iku nembiak.

“Reti iya, kitai ngembuan mayuh agi nembiak ngambi subjek Stem tu,” ku iya.

Ngelansa pasal makmal nya, Dr Annuar madah lebuh makmal nya dipejalai, bala pengajar rindu agi ngajar pasal Stem ngagai nembiak sekula primari.

Ku iya, makmal nya mega diatur ba zon utara enggau selatan enggau komiti kereja ditumbuh pengudah renggat kepenudi.

“Buah penemu ti digumpul ba makmal nya deka ditusun enggau dipejurai ngagai Perintah Sarawak ari komiti kereja, baka ni kitai ulih ngemanah penyampau rejister Stem di Sarawak.

“Stem tu beguna amat ungkup Sarawak nuju Revolusyen Industri 4.0 (IR.40) lalu nya kebuah kami begunaka mayuh agi nembiak masuk Stem.

“Kitai nemu pekara pelajar tu di baruh Perintah Sarawak tang tang laban pekara tu beguna amat ungkup Sarawak, kami deka ngemujurka sebarang pekara ti dipejalai Opis Menteri Pelajar dikena mantu nembiak ba menua tu,” ku iya.

Makmal nya mega dipasuk urung 40 iku prinsipal enggau kepala pengajar ari zon tengah ti diatur Opis Menteri Pelajar, Inovasyen enggau Pemansang Penau.

Sama datai Pegawai Opis Pelajar Pelilih Sibu, Ahli Chikba enggau Chairman Gerempung Prinsipal enggau Kepala Pengajar Bagi Menua Sibu, David Teo.