Program Tibang Pemakai M’sia Ke-8 di Unimas

KOTA SAMARAHAN: Universiti Malaysia Sarawak (Unimas) nyadi palan pelajar tinggi kelapan ngelancharka Program Tibang Pemakai Nembiak di Malaysia.

Sapit Menteri KPDNHEP Chong Chien Jen udah dipebasa bejadika program diatur di Balai Kristal, UNIMAS.

Sepenyampau 200 iku nembiak Unimas nerima bantu ari program tu ti nerima pemeri besai ari CS Mini Market.

Program tu deka dipujurka dua gerempung di Unimas iya nya Kaunsil Pengari Nembiak (MPP) enggau Raban Penguna Nembiak (GPS) ngena chara Dapur Pemakai.

Ku Chong Chien, inisiatif Tibang Pemakai Nembiak tu ngena chara ‘Ari Nembiak Ngagai Nembiak’ ke alai opis menteri sida endang nerima manah bala nembiak ngaul diri nyaup raban begunaka bantu.

INISIATIF PERINTAH BESAI… Chong Chien Jen bejaku ba mua mayuh di Balai Kristal lebuh pengawa ngelancharka Program Tibang Pemakai Nembiak.

“Pekara tu dipejalai laban perintah deka nentuka bala nembiak ti deka nampung pengawa megai menua jemah ulih ngasaika mayuh agi peneleba ba pejalai program pengasih baka tu.

“Tu mega deka nerenak semengat volunteer kelimpah chakah ngaul diri ba aktiviti diatur Unimas mantu bala komuniti ti tusah,” ku iya madah nyemetak.

KPDNHEP mega udah nyediaka peluang besai ngagai semua raban bela besaup ngemujurka program tu ngambika pemeri ulih meri pengarap baru ngagai bala nembiak ti benung nampung pelajar sida di palan pelajar tinggi, ku Chong Chien nambah.

Pengawa baka tu mega ku iya dikena mantu ngelempungka tating belanja idup bala nembiak ari ruang bilik seranta tauka raban B40.

“Lebih 16,000 nembiak belajar di Unimas lalu bisi 6,800 iku sida tu datai ari ruang bilik B40.

“Kitai bisi dipadah ke alai mayuh bala nembiak datai ari raban B40 taja sida bisi nginjau ari PTPTN, tang bisi sekeda sida ngirum belanja ke rumah dikena mantu apai indai. Bisi mega sida tu semina makan sekali sehari laban deka ngelimat belanja.

“Chukup sinu meda pekara baka tu bisi nyadi ngagai bala nembiak kitai. Nya kebuah kami ari opis menteri ngelanggur program tu dikerembai ngagai semua Palan Pelajar Tinggi Perintah (IPTA) di menua tu ngambika ulih mantu raban diselinting,” ku iya nerang silik.

Sepemyampau 111,000 diri sebilik ngaul 1,000 metrik tan pemakai udah diagih sepanjai Program Tibang Pemakai dilanchar berengkah ari pun bulan Disember taun nyin tadi.

Projek pemungkal Program Tibang Pemakai Malaysia tu mujur diatur di Fakulti Perubatan, Universiti Kebangsaan Malaysia (UKM) dientudika Universiti Teknologi Mara (UiTM) Permatang Pauh, Universiti Putra Malaysia (UPM), Universiti Malaya (UM), Universiti Teknologi Malaysia (UTM) Skudai enggau Universiti Sultan Zainal Abidin (UniSZA) dalam taun tu.

BANTU PENGASIH… Chong Chien Jen begambar ungkup kenang begulai enggau sekeda ari penerima bantu Program Tibang Pemakai Nembiak di Unimas.