KUCHING: Projek Agropolitan di Sarawak deka ditampung baru pengudah diketu ba taun 2018.
Menteri Muda Betanam Betupi, Tanah Adat enggau Pemansang Kandang Menua Datuk Roland Sagah Wee Inn madahka, Opis Pemansang Orang Betanam Getah Kebun Mit (Risda) udah ngemansangka ladang getah chara berenggat ba Ulu Awik, Saratok di baruh projek tu.
“Kebun getah di Ulu Awik di baruh Projek Agropolitan Bukit Sadok mungkur tanah pemesai 322.57 hektar ti berengkah dipejalai ari taun 2010 ngagai 2017.
“Projek nya mega nyengkaum 155 iku penyereta enggau ungkus pemansang penyampau RM9.13 juta,” ku iya.
Roland madah munyi nya lebuh nyaut tanya ari Adun Engkilili (PSB) Dr Johnical Rayong Ngipa ba Aum Kedua Renggat Kelima Dun Ke-18 ditu, kemari.
Nangkanka nya ku iya, pengawa nanam pun getah ba baruh projek Agropolitan Bukit Sadok dipejalai nengah empat renggat ti mungkur empat blok endur ti udah berengkah mansutka asil.
“Blok A enggau B nyengkaum tanah pemesai 187.65 hektar udah mansutka asil ba bulan Julai 2019 enggai Febuari 2020.
“Pengawa ngatur sereta matau pemansang pun getah nya diatu agi benung dipejalai,” ku iya nerang.
Ungkup rikod, Projek Agropolitan sebagi ari inisiatif Perintah Besai di baruh Opis Menteri Pemansang Menua Pesisir (KPLS) dikena ngemunaska penyeranta rayat menua pesisir lalu berengkah dipejalai di Sarawak ba taun 2009.
Ba taun 2018, KPLS udah mantaika program baru iya nya Projek Bersepadu Pemansang Ekonomi Genturung Pendiau (Prospek) lalu ngujungka projek agropolitan diketu.
Berindik ari nya, nadai agi Projek Agropolitan baru ti dikemendar lalu projek ke bisi diatu deka diterus.
