BARIO: Perintah Sarawak terus matau pejalai projek ngaduka Jalai Pa Lungan sepanjai 12 kilometer (km) nentuka tembu nitih taga sereta nitih ke spesifikasyen enggau standard kereja ti ditetap.

Sapit Menteri ba Opis Premier Sarawak (Pengereja Kasar, Imigresyen enggau Patau Projek) ti mega Kaban Kunsil Nengeri (ADUN) Mulu, Datuk Gerawat Gala madahka projek nya entara projek nengah Ejensi Pemansang Tanah Tinggi (HDA) ti benung dipejalai lalu projek nya diatu tembu 4.7 peratus.

“Perintah semampai matau pejalai projek tu lalu aku ngarapka taba projek ulih lanchar dipejalai nitih spesifikasyen sereta taga ti udah ditetapka,” ku iya pengudah matau projek ke Pa Lungan.

Gerawat madahka pejalai ngabas pejalai projek pemansang ti benung enggau udah dipejalai, kelebih agi nambah perengkaguna pemun sereta pengelantang komuniti.

Kelimpah projek ngaduka jalai, iya madahka entara pemansang nengah HAD ti udah tembu dipejalai iya nya Projek Bekal Ai Beresi Kampung Pa Lungan. “Projek tu diatu meri pemaik ngagai 47 tuai bilik di Kampung Pa Lungan.

“Aku pechaya ke perengkaguna tu beguna amat nentuka peranak ngasai bekal ai ti beresi, likun enggau tejamin agi ungkup dikena besehari-sehari,” terang iya.

Nambah ke nya, Gerawat madahka peranak Pa Lungan mega nerima bekal kuasa karan nengah Skim Elektrifikasyen Menua Pesisir Alternatif Sarawak (SARES), kelimpah rentayan telekomunikasyen ti majak manah.

Ku iya, pengawa nyendia perengkaguna pemun nya meri empas positif ngagai kualiti idup peranak kelebih agi ti diau di menua ulu.

“Nengah pemisi perengkaguna pemun baka bekal ai, kuasa karan enggau telekomunikasyen, kitai ulih meda ubah positif nambah kualiti idup peranak ba menua ulu.

“Nyadi pengari rayat, aku deka terus ngabas enggau matau pejalai projek baka tu nentuka tetiap agih belanja amat dibantai ngagai perengkagu.