MATU: Perintah Sarawak chakah ngemansang menua pesisir nengah pengawa bejalaika dua projek besai Jalai Passin enggau Projek Bekal Kuasa Karan Menua Pesisir (RES).
Kaban Kunsil Nengeri (ADUN) Daro, Safiee Ahmad madah, projek jalai ti dikemendar Premier Sarawak kenyau 2018, diatu dipejalai baru kunteriktor pengelikun pengudah dikategori projek sakit.
Iya madah, projek nya diatu manggai 30 peratus lalu disadang tembu manggai Disember 2026.
“Pengawa bejalaika baru projek tu bukti pengeransing perintah nengeri nentu infrastruktur di menua pesisir terus dikemanah.
“Tu beguna amat dikena nyambung komuniti menua pesisir enggau endur bukai sereta ngerandang mayuh agi peluang ekonomi enggau sosial ngagai rayat,” ku iya.
Safiee mansutka jaku nya rambau Pengerami Ngiling Bidai Gawai Dayak 2025 di Rumah Lucy, Sungai Passin ditu, kemari.
Tampung iya, siti agi projek besai ti benung dipejalai iya nya projek RES ti manggai 76 peratus lalu disadang tembu ba taun baru.
“Aku ngerah projek RES tu dikerumban ngambi ulih meri pemaik ngagai peranak ditu sebedau pengerami Gawai Dayak ba taun baru kelimpah meri reti ti besai ngagai pengerami komuniti di sitak tu,” ku iya.
Peranak Sungai Passin enggau ngelingi nya nerima manah pemansang positif dua projek nya sereta ngarap projek nya tembu nitih langgur.
