KUCHING: Kuasa ngemendar projek pemansang beungkus manggai RM50 juta ba Sarawak ulih ngerumban pengawa nyeleti sekula enggau klinik repuk ba menua tu. Sekretari Besai Sarawak, Ahmad Nadzri Mohd Hassan madah, pekara nya meseti dikena Opis Menteri Pelajar enggau Opis Menteri Pengerai ti beempu tanggungpengawa enggau manah.

“Pengawa nyeleti klinik repuk mega ulih ngena agih belanja begulai RM50 juta nya, tu meseti diberi perati lengkas ari dua opis menteri bekaul nyengkaum Opis Menteri Wang,” terang iya.

Ahmad Nadzri nibar jaku nya pengudah ngatur penemuai basa ngagai Premier Sarawak Datuk Patinggi Tan Sri Abang Johari Tun Openg di Wisma Bapa Malaysia, ditu kemari.

Kena 4 Januari tu tadi, Menteri Besai Datuk Seri Anwar Ibrahim madah, Opis Menteri Wang setuju bejalaika projek beungkus baruh RM50 juta di Sabah engau Sarawak ditetapka nyau deka semua ari perintah nengeri enggau nitih atur wang.

Kena 26 Januari tu tadi, Menteri Pelajar, Fadhlina Sidek madahka Sarawak bisi 568 sekula repuk. Kelimpah ari nya, Ahmad Nadzri mega bisi berandau pasal isu pengelikun ba adan menua darat tauka kandang Tasik China Selatan diberi perati ngambi dikenatai ngagai Perintah Besai.

Iya mega madah, muak ke lemai bisi Pengawa Sungkei begulai enggau semua tuai opis nengeri enggau opis perintah besai ti digulu Sekretari Perintah Sarawak, Datuk Amar Mohamad Abu Bakar Marzuki lalu berandau pekara besai ngambi diripot terus ngagai Tuai Sekretari Menua.

Abang Johari mega nerima penemuai basa kedua ari Tuai Pegawai Eksekutif, Kaunsil Asil Dalam Menua (LHDN), Datuk Dr Mohd Nizom Sairi lalu nerang pasal operasyen LHDN di Sarawak enggau asil chukai terus ari Sarawak ti dikemaru belanggang lalu dipadah ngagai Sekretari wang Nengeri Sarawak, Datuk Seri Dr. Wan Lizozman Wan Omar baka dipinta perintah nengeri.