SIBU: Projek selapat bah Taman Rimba Bukit Lima enggau Kampung Sentosa ditu disadang tembu ba tengan bulan March 2025.
Pekara nya dibantai Kaban Kunsil Nengeri (ADUN) Bukit Assek, Chieng Jin Ek rambau ngabas pejalai projek nya ensanus.
Iya madah, naka 25 Disember 2023, pejalai projek nya manggai 19.35 peratus.
“Tu mandangka projek nya manggai 5.64 peratus tumu agi ari langgur asal,” ku iya.
Chieng madah, renggat keterubah projek nya udah nerima agih belanja sepenyampau RM21.3888 juta ari Perintah Sarawak sereta udah diserah ngagai kunteriktor ba tengan bulan Mei 2023.
“Opis Parit enggau Entali Ai (DID) Sarawak diberi pengandal ati nyadi pengatur projek tu ti mungkur pengawa ngaga parit semin sepanjai 1,630 meter, nyeleti enggau nangkir parit tanah sepanjai 5,200 meter sereta ngaga parit tanah sepanjai 950 meter,” terang iya.
Ku iya, sitak genturung pendiau nya ngembuan gaya tanah ti baruh lalu ai suah betadu dia pengudah ujan kelebih agi ketegal sistem parit dia ti enda meruan.
“Enti udah tembu ila, nya deka nambahka pengelanchar sistem parit sereta nentu peranak dia enda napi penusah ai betadu sereta bah pengudah ujan,” ku iya.
