Proses P&P SK Sungai Buloh tejanggal ketegal penusah bah

TAMIN: Urung 148 iku nembiak sereta 21 pengajar Sekula Primari (SK) Sungai Buloh, Selangau tejanggal neruska pengawa belajar enggau ngajar (P&P) baka sekula bukai ketegal penusah bah.

Mejar (PA) Raban Penyaga Pengelikun Mensia Mayuh (APM) Ismail Mahedin madah, tu beduduk ari ujan ti bangat nyadi demalam.

“Beduduk ari ujan nya ngujungka Sungai Buloh terus pasang.

“Tikas penalam ai ba sekula tu iya nya semeter ngagai 2.5 meter kaki,” ku iya madah ba siti pengarang berita.

Ku Ismail, tinjau ba palan nya beratika sekula udah ditiki ai lalu sebengkah begunan ti baruh ditemu udah kena bah.

“Urung jam 11.30 pagi tadi, bala nembiak udah diasuh pulai lalu sekula mega nadai bejalaika operasyen baka selama.

“Taja tikas ai majak niki, tang sekula tu agi dalam perati ti manah,” ku iya.

BAH… Siku pemesai APM benung nyukat penalam ai bah ti nuntung SK Sungai Buloh, Selangau.