PSB enda ngetu gawa taja nadai geran

ENGKILILI: Parti Sarawak Bersatu (PSB) terus ransing ngemujurka agenda pemansang lebih agi ungkup komuniti Dayak ba nengeri tu.

Kaban Kunsil Nengeri (Adun) Engkilili Dr Johnical Rayong Ngipa madah taja nadai agi dalam perintah, tang tanggungpengawa negika hak rayat lebih agi ba menua pesisir enda kala diketu.

“Kami sedar nasip enda selama iya jai lalu sempama baka matahari lama laun ayan meri penampak…pia mega PSB tu,” ku iya seraya madah tanggungpengawa meruan dipejalai taja bisi penimpang ari sukut agih belanja MRP enggau RTP.

Iya madah munyi nya rambau bejadika jematan baru enggau pengerami merarau ba Rumah Michael Peter Willie, Sebangkoi, Skrang apin lama ke udah.

Ku iya, arapka rayat ba semua sitak ke diarika PSB nyngkaum Engkilili mereti pasal belanja ke udah dirampas ari jari sida (pengari rayat PSB).

MERUAN GAWA…Dr Rayong (tengah) begambar kenang enggau bala penerima chek rambau pengerami ke diatur ba Rumah Michael Willie, apin lama ke udah.

Taja pia, Dr Rayong berasai sinu meda penyukung iya mereti sentang penanggul ke ditapi parti diatu lalu ngarapka sida terus nyukung PSB ba pengawa bepilih deka datai.

“Kami andal pengundi terus nyukung parti ke diiring Dato Sri Wong Soon Koh sereta bala bakih bukai ba selampur nengeri,” ku iya.

Ku iya, pengawa PSB sigi enda ngetu ngapa taja nadai geran MRP enggau RTP lebih agi bekaul enggau tanah NCR ke chukup semak ba ati bansa Dayak, pengawa puang ke enda bela sereta penanggul mayuh orang empai teulihka pengawa lalu enda teputar.

Dr Rayong ke mega Ketuai Nembiak parti meransang rayat Sarawak nyereta parti nya laban parti tu endang bepelasarka pupu bansa sereta ngatika diri.

“Pechaya mih…penemu kita tetap dipending lalu sedia nerima mayuh penemu ungkup sebuah perintah ke baru, beresi sereta lepas ari sebarang utang udah tu,” ku iya.

Sama datai bala ketuai raban bansa, raban orang gawa perintah sereta komuniti ke besemak.