INDUN SILONG
Suarasarawak.news@gmail.com
KUCHING: Anugerah Penyulut Industri Premier Sarawak (PSIEA) ulih ngangkat profil dagang Sarawak ngagai renggat nasional.
Presiden Gerempung Dagang Sarawak (SBF), Datuk Seri Abang Abdul Karim Tun Openg madah, anugerah nya deka meransang orang dagang di nengeri tu bebendar agi gawa dudi hari.
“Juluk kami deka nganjung nama dagang ti chukup manah ngagai renggat nasional lalu baka ti ditemu kitai, anugerah tu berengkah diatur ba renggat nengeri, udah nya baru ba renggat nasional.
“Aku ngasai juluk nganjung nama pedagang Sarawak ti nyulut tu ukai semina nempa sida nyadi orang dagang enggau komuniti dagang ti nyulut di Sarawak aja tang ba renggat nasional mega,” ku iya.
Abang Karim bejaku munyi nya rambau pengawa ngelanchar PSIEA di Auditorium Kampung Digital TEGAS ditu, sehari tu.
Iya madah, Sarawak udah netap juluk deka nyadi nengeri bepenatai pemisi tinggi sereta maju manggai ba taun 2030.
“Nya alai, PSIEA bejalaika tanggungpengawa besai dikena nyukung agenda ekonomi maju enggau nambah produktiviti di nengeri tu.
“Aku meransang mayuh agi raban pedagang ngambi bagi ba pengawa tu.
“Kena mih pelasar tu nyadi peransang ungkup ngepun transformasyen, netap tikas dagang manah alai bejalaika pengawa pemadu manah sereta nempa pemeruan legasi kita,” ku iya.
-abis-
