INDUN SILONG
Suarasarawak.news@gmail.com
KUCHING: Anugerah Penyulut Industri Premier Sarawak (PSIEA) ngesan tanggungpengawa ti beguna amat ba pengawa narak ekosistem dagang ti tegap dudi hari kelebih agi dikena napi semekih dunya enggau transformasyen digital ti majak ngerembai.
Sapit Premier Sarawak, Datuk Amar Awang Tengah Ali Hassan madah, PSIEA ulih meri inspirasyen ngagai dagang menua ngembi ngemerat inovasyen, pengelantang enggau besemekih ba renggat global.
“Pejalai nuju ekonomi dudi hari bepanggai ba tikas pengulih kitai nelebaka diri, ngemoden enggau bejalaika pengawa ti proaktif ngagai ubah makit ti semampai dinamik.
“Anugerah baka PSIEA ukai semina ngelala pemujur diatu aja tang ulih meransang semengat terus ngangkatka diri ba penumbuh transformatif,” ku iya.
Teks jaku iya dibacha Sapit Menteri Dagang Antarabansa enggau Meranak Puku, Datuk Dr Malcolm Mussen Lamoh rambau ngelanchar PSIEA di Auditorium Kampung Digital TEGAS ditu, sehari tu.
Iya madah, lebuh menua ngemeratka selinting Wawasan 2030, genap cherita penyulut deka nyadi peransang Sarawak nuju pengawa ti maju sereta inklusif agi.
Awang Tengah ti mega Menteri Dagang Antarabansa, Industri enggau Meranak Puku madah, PSIEA terus ngaga kelai diri nengah anugerah renggat nasional baka Anugerah Penyulut Industri (AKI).
