KUCHING: Rayat Sarawak ti diau ba menua luar tau beambi ulih ari rega tambang bilun AirBorneo ti berengkah ari RM300 dikena ngemuntangka pejalai pulai ngundi ba Pengawa Bepilih Besai (PRU) Sarawak Ke-13 tu.
Premier Sarawak, Datuk Patinggi Tan Sri Abang Johari Tun Openg madah, rega tambang ke bisi diatu ulih dipilih sida ti deka pulai ngundi ke Sarawak.
Iya madah, perambu meri diskaun khas tauka tikit penerebai bilun ti murah agi ngagai pengundi begunaka pengawa nyerenih enggau silik dikena nyeliahka sebarang interpretasyen ti tau ngaitka iya enggau elemen ‘nginti undi’ sekumbang pengawa bepilih.
“Pengawa nya meseti diperatika. Asal iya enda nyadi penyalah makai suap.
Enti kitai meri diskaun khas, orang ulih nerangka nya nyadi insentif ti ditetapka. Kitai patut meda definisyen nya,” ku iya. Abang Johari nyebut pekara nya lebuh dirandau pemberita pengudah pengawa ngelancharka penerebai bilun terus Kuching-Jakarta, ditu, kemari.
Iya madah munyi nya lebuh ditanya sekalika AirBorneo ulih meri mayuh agi diskaun ngagai peranak Sarawak ke deka pulai ngundi, berindik ari ungkus penerebai bilun ti dikumbai mar.
Iya madah baru, pengundi ulih ngena servis AirBorneo ti bisi nyendiaka tambang bilun enggau rega RM300 lebih aja nyadi siti ari pilih sida ti deka pulai ke Sarawak.
“AirBorneo aja RM300 lebih, tambang penerebai tetap. Sida tau datai ngena RM300 lebih,” ku iya.
Iya nambah, sebarang bansa pengawa melanja tauka diskaun khas enda tau enda ngambi kira interpretasyen undang-undang bekaul enggau pengawa bepilih ngambika enda ngenataika saru penemu bekaul enggau pengawa meri insentif ngagai pengundi.
Berindik enggau nya, iya nyemetak madahka sida patut bejimat enti sema berundingka sebarang inisiatif bekaul enggau rega tambang bilun dalam timpuh pengawa bepilih.
