BAU: Pun rian ti udah ditanam patut dijaga sereta diintu enggau manah ngambika ulih idup enggau galak sereta tau dikomersial nyadi siti ari pengawa dagang.

Sapit Sekretari Perintah Negeri ti mega Presiden Gerempung Penanam enggau Dagang Rian Sarawak (PPUDS) Datuk Ik Pahon Joyik madahka nanam pun rian enda begunaka palan tanah ti besai tang ulih nyadi dagang ti manah ba makit luar.

“Nanam pun rian semina begunaka urung tiga ngagai empat hektar tanah aja, tang sepun rian ulih ngeluarka asil mayuh.

“Ba genturung Bau udah bisi dua tauka tiga iku peranak menua udah mujur bedagang buah rian,” ku iya.

Ik Pahon bejaku munyi nya lebuh bejadika Kus Pemun Nanam Rian ti diatur Opis Betanam Betupi nengah kerejasama PPUDS di Balai Mensia Mayuh Siniawan ditu, kemari.

Ku iya, bagi orang ti napi penanggul pun rian enggai bebuah, sida tau minta bantu ngagai Opis Betanam Betupi nengah skim ngintu pun rian.

“Skim Ngintu Pun Rian ari Opis Betanam Betupi ulih mantu kita ngintu pun rian ti udah besai awakka pun rian nya lebat bebuah.

“Pekara tu beguna laban perintah endang dalam perambu deka ngemansangka menua pesisir awakka seikas enggau mengeri,” ku iya.

Pia mega, iya madahka sida deka ngempung raban pemain industri rian begulai, belajar, berkunsika penemu enggau bekerejasama.

“Enda milih kita orang bekebun, bejual, pemekal enggau pedadagang rian semua dibai sama dalam gerempung tu.

“Ari nya kitai ulih belajar enggau bekunsika penemu enggau peneleba baka proses nanam pun rian, nyaga pun rian, nguna teknologi digital pasal nanam rian enggau ke bukai.

“Kami mega andalka, menua kitai ulih nyaga bemacham bansa buah rian ti nyelai enggau lunak baka buah rian temaga singgai,” ku iya.