Putar lengkas penanggul kami!

PAKAN: Peranak pelilih Pakan minta perintah lengkas berunding sereta mantu sida mutarka penanggul nadai arus internet ba genturung pendiau sida.

Siku peranak menua Pakan Minggu Dollah,34, madah penanggul nadai arus internet tu majak berasai diasaika sekumbang Atur Tagang Pejalai (PKP) diteritka perintah apin lama ketegal pengerekai igi penyakit covid 19.

“Sekumbang PKP dipejalaika perintah pupu rata nembiak sekula ditu belajar sereta ngaga kereja sekula diberi pengajar nengah chara online magang.

“Berindik ari penanggul nya nembiak sekula ba genturung besemak ditu balat betapi enggau pemedis deka ngenembuka pengawa pelajar sida ti diberi pengajar nengah aplikasyen WhatsApp.

“Ketegal enda sanggup meda nembiak napi pemedis deka belajar baka tu meh aku minta kasih ngagai perintah perundingka mih enggau lengkas penanggul tu ngena sebarang chara,” ku iya nusika sebana ngagai pemberita.

BERANGKUT…Ninting hari berangkut ngagai palan tu laban deka ngulihka arus internet endur bala nembiak nembuka pelajar sekula diberi bala pengajar.

“Dikena ngelempungka tating pemedis nembiak ti deka belajar aku empu mega ngambi inisiatif mantu sida nengah chara nyendiaka perengka pengangkut dikena sida nurun ari rumah panjai nuju palan ‘kelas’ sida iya ninting hari.

Nambah nya ku iya,kelimpah ari penanggul nadai arus internet nembiak enggau mensia mayuh besemak ditu mega betapi enggau gaya jalai alun ti lichin.

“Jalai tu cukup pedis ditengah lebuh maya maya ujan laban lichin.

“Kami mega nadai jalai bukai dikena nurun ngalu ke pasar Pakan tauka Sarikei nya alai besai pengarap ke jalai tu mega nerima perati ari perintah udah tu,” ku iya.

Ungkup penerang,genturung menua tu ditu ngembuan lima buah rumah panjai sereta dua buah sekula primari sereta kira urung 45 minit bejalai ngena entukar (4wd) penyauh ari Pasar Pakan.