SRI AMAN: Pengawa raban bujang berani ke udah berambunka nyawa ngetan menua semampai dikenang lalu jasa sida seruran nerima perati ari Gerempung Pekara Veteran Soldadu Kor Renjer (PVTKR).
Chairman PVTKR Lt.Kol (Pinchin) Mohd. Melintang Abdullah madah, genap iku raban soldadu darat ti udah pinchin enda dikemelu lalu sida deka seruran nerima perati tauka bantu ari perintah nengah Opis Pekara Vetetan (JHEV) nyema sida udah ngerejista diri.
Ku iya, PVTKR merambu deka muka palan servis ba selampur menua Sarawak ngambika tiap peminta ari bala veteran soldadu.
Nangkan nya ku iya, penumbuh palan tu ila mega dikearap ulih dikena nyidi raban pinchin soldadu kebukai ba sesebengkah genturung pendiau tauka menua ke mega apin ngerejista diri nyadi kaban gerempung baka raban ex- Sarawak Renjer enggau Iban Tracker lebih agi sida ba menua pesisir.
“Sehari tu (apin lama ke udah) kami sebuat bisi ngabas iku Bujang Berani.
“Ari pansik kami sida tiga tu nadai nerima bantu tauka elaun.
“Nya alai, peminta bantu BSH enggau pekara peminta bekaul pengerai sida tiga tu deka diadu kami diatu sereta ngarapka semua penanggul enggau peminta bekaul sida tiga tu ila mujur diputar enggau jampat,”ku iya nengah sebengkah penerang pasal penemuai ngabas tiga iku veteran di Sri Aman.
Rambau Program Nemuai Ngabas Veteran Soldadu D arat ba Rumah Marphy Jeritan, Selanjan, Sebemban enggau ba pelilih Melugu Skim B , dia JHEV mujur ngaduka penerang enam iku agi veteran ba portal ejensi nya ngambika ulih nerima bantu PJM jemah.
Entara veteran soldadu ke bisi diabas raban PVTKR tu iya nya Pantan Sampang, 84 taun, Maing @ Maeng Lengkak,64 taun enggau Nelson Anggor,63 taun.
Sida tiga tu bela enda dapat gawa. Pantan diau kediri nadai orang nupi, Maing mega enda dapat gawa laban udah patah tulang rusuk ketegal eksiden, enggau Nelson ti udah kena strok.
Raban veteran tu bela nadai kala nerima bayar bulan ari BKK enggau BHN.
Sama bisi nyereta program sehari nya iya nya Direktor Opis Pekara Veteran Soldadu Darat (ATM) Mejar Pahot Joll enggau veteran bukai.
