PVTKR ngabas Lt Kol (B) James Tomlow

KUCHING: Gerempung Veteren Tentera Kor Renjer (PVTKR) terus regas bejalaika pengawa ngabas sereta mantu raban veteran soldadu ke ditemu enda berapa gerai dikena ngingatka jasa sida nyerumba bulan Hari Bujang Berani ke disambut kena 31 Julai tu tadi.

Ensana kena 5 Ogos pejalai raban PVTKR diuluka Presiden iya, Lt. Kol (B) Mohd Melintang Abdullah bisi ngabas Lt. Kol (B) James Tomlow anak Isa di rumah iya di Tabuan Jaya, ditu.

Ungkup penemu, Tomlow tu orang bansa Iban keterubah bulih pangkat ti tinggi Leftenan Kolonel ketegal ti udah bebendar ngetanka pengelikun jeman menua tu agi kudi kelia.

“Lt Kol Tomlow tu kitai Iban keterubah nyadi pegawai dalam soldadu enggau keterubah Iban niki pangkat ngagai Leftenan Kolonel,” ku Melintang.

Tandu Melintang, nyadi pejalai ngabas taun tu dikereja laban ti enda ulih begempuru bebala mayuh baka selama ketegal pengerekai penyakit Covid-19.

“Taun tu kitai enda ulih ngatur gempuru besai nya alai dikena ngenang jasa raban Bujang Berani, kitai semina ulih bejalaika pengawa ngabas sida baka ke sehari tu,” ku iya.

Ngelansa penemuai nya, sida Tomlow sebilik meri pengaga ati ngagai raban PVTKR laban ti seruran ingatka jasa raban veteran ke udah pinchin.

Diatu Tomlow nyau enda dapat angkat ketegal umur nyau majak tuai, taja pia semua pengawa ke udah dikereja kelia agi meruan dikeingat. Iya nadai kakang nusui pengingat maya ke agi gawa keli begulai enggau Lt kol (B) Lunus Linsong Janti.

Sebedau pinchin Tomlow diasuh nyadi pemesai polis sereta kala gawa ba Rajang Area Security Command (RASCOM).

Sama bisi datai ngabas Tomlow, Penyanding Penemu PVTKR Lt. Jen (B) Datuk Stephen Mundaw, Lt Kol (B) Anwar Bashakan, Lt Kol (B) Linus Lunsong, sereta PW II (B) Klement Nyapong.

Gambar Lt. Kol (B) James Tomlow anak Isa maya agi gawa.

Suara Sarawak