KUCHING: Raban Penyangga Orang Periman Malaysia (APM) Nengeri Sarawak udah nyikap diri ba bemacham chara nyengkaum enda ngemendarka kemisi pegawai enggau raban APM ngambi napi penusah bah ba timpuh Monsun Timur Laut (MTL).
Ku Direktor nya, Mohtar Samat, bisi 2,666 iku enggau bemacham kereban ba semua 22 pelilih di nengeri tu nyikap diri napi penusah nya kelebih agi ba endur ti suah napi penusah bah.
“Kami mega udah nyendiaka 116 buah bot bemacham pemesai enggau 16 ambulans dikena enti sema penusah ngenyit kelebih agi penusah bah nyadi ila.
“Ungkup penyikap tumu, bisi sekeda bot diengkah ba renggat komuniti baka ba Selangau enggau Marudi laban nya entara endur ti suah dituntung penusah bah. Kerejasama tu mega mungkur komuniti dia,” terang iya.
Mohtar mansutka jaku nya ba aum pemberita pengudah bejadi Latih Penyikap MTL 2023/2024 APM Nengeri Sarawak di Tebing Sungai Rantau Panjang, Batu Kawa, ditu tadi.
Ku iya, ungkup endur ti suah bah, sida udah nganjung raban gawa 24 jam sehari ngambi meri ripot tumu enggau bejalaika tanggungpengawa enggau lengkas agi.
