KUCHING: Komiti pengatur Hari Pemberita Nasional (HAWANA) enggau Aum Media Sarawak (SMeC) 2025 dirami ba siti program ngaku ti diatur ditu, malam tadi.

Direktor Unit Komunikasi Awam Sarawak (UKAS), Awang Putrayusrie Awang Redzuan madah, pengawa ngaku nya diatur berindik ari kerejasama enggau komitmen raban nya ngemujur dua program ninting taun nya.

“Taja pen pengawa ngatur HAWANA enggau SMeC ungkup taun tu chukup enchabar tang berindik ari kerejasama tegut raban pengatur nyengkaum raban media, kitai mujur ngatur program tu nitih perambu,” ku iya.

Awang Putrayusrie mansutka jaku nya rambau Program Ngaku Komiti Besai Serimbai HAWANA enggau SMeC 2025.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol diberi basa bejadi program nya.

Nangkan nya, Awang Putrayusrie ngarap kerejasama manah nya ulih ditampung sereta dipasuk mayuh agi bakih strategik ungkup ngemujur program sebaka dudi hari. – EDISI UKAS