SARATOK: Raban kepenudi dikuarantin ba Kolej Pom Enam Saratok (KTES) udah dikemendar pulai sehari tu.

Sapit Menteri Pengeluar Kuasa enggau Pengeraja Asal, Datuk Ali Biju madah, 12 iku nembiak kolej nya nyadi orang dipatau (PUS) laban bisi kontak semak enggau kes positif Covid-19.

Ku iya, sida nya dikemendar pulai laban semua pemutus swab test tauka chulit kedua bela negatif.

“Sida tu diasuh bepekul enggau dipatau laban siku ari nembiak KTES ditemu positif Covid-19 dikena nagang igi penyakit tu ngerekai ke bukai.

“Puji Tuhan, semua pemutus peresa chulit sida 12 iku tu negatif magang,” ku iya ba sebengkah penerang berita ditu tadi.

Ke penerang, bala nembiak nya dikuarantin ba Palan Ngubat enggau Kuarantin (PKRC) ba KTES dia kenyau ari 23 April nyin tadi.

Berebak enggau nya, raban Bomba Saratok mega udah bejalaika sanitasyen ba kolej nya seriris enggau atur pengawa ari Opis Menteri Pengerai Malaysia (KKM).

Ba lansa bukai, iya madahka Program Betuchuk Vaksin Renggat Kedua deka berengkah dipejalai 22 Mei tu ungkup orang ti mudah kena rampit.