KUCHING: Perintah Sarawak enda kalai nejuka rayat ti napi penusah tang semampai nyadung bemacham bantu kelai betati ke nasip sida.
Sapit Premier Sarawak, Datuk Amar Douglas Uggah Embas madah, sepanjai musin landas ari 5 November 2024 nyentuk 25 March 2025, Sarawak dituntung bah besai enggau tanah tusur ti balat nating beribu peranak.
“Bisi 101 Palan Ngenduh (PPS) dibuka mungkur 5,037 tuai ruang bilik enggau sida sebilik,” ku iya lebuh nyimpul jurai Aum Keterubah Penggal Keempat Aum Kunsil Nengeri (DUN) Sarawak, ditu tadi.
Ku iya, Ejensi Penyangga Penusah Menua (NADMA) ngagihka Bantu Tasah (BWI) penyampau RM1,000 ngagai tiap tuai ruang bilik lalu semua bantu nya penyampau RM5.04 juta.
“Opis Pengelantang Komuniti Sarawak mega nganjung barang diguna ngagai raban tasah di PPS,” ku iya.
Iya mega madah, enam nyawa bebadi ba timpuh nya, lima nyawa ketegal penusah tanah tusur di Kampung Lereng Bukit, Miri enggau siku da parai lemas maya bah di Bintulu.
“Ruang bilik ti dituntung penusah tu udah nerima Bantu Rabat penyampau RM10,000 ari NADMA. Ngena peluang tu, Perintah Sarawak meri penyinu ati ngagai semua ruang bilik ti dituntung penguji besai tu,” ku Uggah.
