KUCHING: Perintah Sarawak patut meri bantu mata duit ngagai volunteer ti mantu komuniti kurang benasip ngambi pengawa ti beguna dipejalai enggau lanchar.
Chairman Kaunsil Mengeri Kota Samarahan (MPKS), Datuk Peter Minos madah, perintah ngembuan pangku pengawa besai dikena mantu raban volunteer mujur nyendia bantu ngagai raban diselinting.
“Sida ti ngemerat enggau nyaga raban kurang benasip tu beguna ke belanja dikena bejalaika pekara tu.
“Ukai semina orang kediri tang perintah mega patut meri perati ti chukup siru ngagai sida ti amat beguna ke bantu ba komuniti. Anang ngelaung pekara ti diguna sida,” ku iya.
Peter mansutka jaku nya rambau ngabas reruai Gerempung Pengelantang enggau Pemansang Penau Orang Nyelai Pendiau Kuching (KATSN) ba palan bebeli barang Plaza Merdeka ditu, kemari.
Ngelansa pekara nya, iya madah, MPKS nyendia bemacham bantu ngagai gerempung Salvation Army ti udah numbuhka opis sida ba Kota Samarahan.
Ku iya, bantu nya diberi laban raban volunteer gerempung nya mantaika pengibuh enggau pengasih sida ngagai bala anak mit ti nadai daya sereta enda dikeibuh.
“Kitai muji pengawa sida ti mandangka pengasih ngagai raban ti kurang benasip tu,” ku iya.
Ngelansa senentang eksibisyen KATSN, Minos minta mensia mayuh sampal datai meri sukung ngagai bala anak autistik nengah pengawa meli asil dero sida.
