Rainforest In The City deka dirami ninting taun

KUCHING: Perintah Sarawak merambu ngangkatka pematak baru dikumbai Rainforest In The City nyadi pengerami ninting taun.

Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madahka opis menteri nya beratika pekara tu lalu deka berundingka perambu nya.

“Kitai udah bejalaika pansik ba kesemua rintai pengerami nya lalu nerima timbal manah ari bala pengusung.

“Nya kebuah opis menteri kami bisi ati berunding deka ngatur pengerami tu dudi hari.

“Taja pia, pemujur perambu tu tentu deka dilempaika aku ngagai kabinet Perintah Sarawak mutuska iya,” ku Abdul Karim nerang.

Iya mansutka jaku nya pengudah ngelanchar Pengawa Bejadika Sarawak Asia Kitchen di Rainforest World Musik Festival (RWMF) 2019 ba Kampung Budaya Sarawak kemari.

Karim ngelansa pasal Rainforest In The City 2019 ti udah nerima lebih ari 10,000 pengusung kandang sepuluh hari diatur.

Pengerami tu mega diatur keterubah berengkah ari 2 nyentuk 11 Julai di Amphitheater Kuching beserimbai enggau pengawa ngelalu penatai RWMF 2019 di indu mengeri Sarawak.

PEMATAK TEMUAI… Abdul Karim bejadika Sarawak Asia Kitchen di Kampung Budaya Sarawak, entara pematak RWMF 2019, kemari.