Randau 14 pekara benung dipejalai

KUCHING: Kepala Menteri Datuk Patinggi Abang Johari Tun Openg madahka diri lantang ati pasal aum bekaul 14 pekara ti benung dikerandau Komiti Khas Kabinet.

Randau nya dikena beratika baru atur pejalai Sempekat Malaysia 1963 (MA63) enggau Perintah Besai.

Ku iya, pekara tu endang agi diperundingka bala Komiti Khas Kabinet nyengkaum beratika baru pekara wang enggau status Kort Tinggi Borneo.

“Aku berasai lantang ati kelebih agi bala komiti khas sereta agi nganti asil ari aum laban agi tubah pekara benung dipejurai.

“Tu nyengkaum pengawa beratika baru pekara wang enggau status Kort Tinggi Borneo,” ku iya nerang.

NYAUT TANYA… Datuk Patinggi Abang Johari Tun Openg nerang ngagai pemberita di Wisma Bapa Malaysia ditu tadi. – Gambar Nadim Bokhari.

Abang Johari bejaku munyi nya lebuh ditanya pemberita di Wisma Bapa Malaysia ditu tadi.

Ku iya, taja Perintah Sarawak mengkang ngetanka pangku pengawa Kort Tinggi Borneo tang pemutus sentang pekara nya bedau ditemu nyemetak.

“Kita endang deka ngetanka 14 pekara tu tang diatu meri pelang ngagai Komiti Khas Kabinet berunding dulu.

“Aku ngarapka pekara tu teulihka pemujur ba bulan Oktober ila,” ku iya andal.

Ku Abang Johari, pekara minyak enggau gis deka dibai dalam randau bala Komiti Khas Kabinet taja iya sebagi ari pekara 14 nya.

“Taja iya sebagi ari 14 pekara dibai dalam aum nya, tang kami mai pekara (minyak enggau gis) tu ngagai Menteri Besai Tun Dr. Mahathir Mohamad nyengkaum aku empu enggau Kepala Menteri Sabah Datuk Seri Mohd Shafie Apdal.

“Kebuah pia laban pekara minyak enggau gis tu bisi penyelai lalu randau benung dipejalai,” ku iya nerang silik.

Kemari, Opis Menteri Besai ba sebengkah penerang madahka bisi tujuh pekara bekaul enggau Sarawak enggau Sabah udah disetuju nengah aum Komiti Khas Kabinet sentang MA63, tang 14 pekara agi ba renggat diperunding lalu dipelaba deka diputus ujung bulan tu.

Suara Sarawak