KUCHING: Program radio Randau Digital Sarawak datai baru bulan ngemai batang jurai ‘Juh, kenali apa itu Old Kuching Smart Heritage (OKSHE)’ naburka penerang ngagai bala peninga selampur Sarawak sentang inisiatif ngintu sereta nyaga pesaka asal.
OKSHE tu sebengkah inisiatif di baruh Opis Kepala Menteri ti megai tanggungpengawa ngintu sereta nyaga pesaka asal enggau main asal nengah teknologi pintar.
Entara batang pekara OKSHE iya nya dikena mantu nyungkak ekonomi komuniti ngaul ubah ari sukut gaya pengidup.
Entara chunto inisiatif deka dipejalai iya baka program Agenda OKSHE diatur kena 25 ngagai 31 Mac 2019 mandangka pengawa ngena e-wallet baka Sarawak Pay, bekenaka aplikasyen baka e-peraduan ti nyendiaka mayuh perais manah, pekit amazing race ti ngena aplikasyen telefon pintar enggau ke bukai.
Pia mega, teknologi AR/VR udah dikena ngemaju inisiatif ngintu, nyaga enggau mandangka cherita sejarah enggau penatai asal ngagai rebak dudi.
“OKSHE tu sebengkah projek pemungkal ngangkatka Old Kuching nyadi mengeri pesaka asal pintar di Kuching kandang lima taun deka datai,” ku Profesor Ir. Dr. Al Khalid bin Haji Othman, Sapit Ketuai Saintis enggau Ketuai Penyanding Penemu Ekonomi Digital Sarawak dalam Randau Digital Sarawak ke deka dipansutka 22 Mei 2019.
Iya begulai enggau Pemesai Pengawa Sarawak Multimedia Authority (SMA) Abang Mohd Nashriq Bin Abang Heilman, Pemesai Pengatur Pengawa SMA dalam program radio ti diatur SMA enggau kerejasama Angkatan Zaman Mansang (AZAM) Sarawak nengah CatsFM.
Sida bekunsi penyelai program OKSHE ngambi ngerapitka kaul begulai entara perintah enggau komuniti dikena mandangka main asal enggau pesaka asal digital sereta pintar di Kuching setipak enggau inisiatif ekonomi digital Sarawak nyadi Mengeri Pintar tauka Smart City.
Nengah sejarah pesaka asal ke ditemu enggau enda ditemu sereta program main asal enggau pesaka asal, mengeri pintar Old Kuching tu ulih nyadi pintu penama ngagai mengeri ke bukai di Sarawak kelimpah nambah mayuh agi pemansang ekonomi nengeri tu.
Kenu ku Prof Khalid, projek OKSHE tu sebengkah projek pemungkal ti ulih dilanggur ungkup palan pesaka bukai baka di Baram, Telang Usan enggau ke bukai.
“Pekara tu nunjukka rayat Sarawak udah sedia nerima ubah tang agi ngetanka pesaka asal,” ku iya nambah.
Prof Khalid mega ngelalau mensia mayuh chakah bejalaika pangku pengawa diri ngambika OKSHE tu ulih nyadi sebengkah pemansang ngemai pemaik ari sukut ngangkatka pesaka asal Sarawak ngaul pekara digital.
OKSHE tu mega ngajar komuniti asal sedia nerima ubah digital ukai semina ba pemansang diri empu tang mega pengelikun sida.
Ambika chunto, pengawa ngelekatka CCTV enggau tiang lampu (High Mast) di genturung pendiau ulih nentuka pengelikun sida dijamin nipakka tuju digital ekonomi Sarawak iya nya Smart City – Safety & Security.
Nambahka nya, mayuh latih deka dipejalai raban Centre of Technical Excellence Sarawak (CENTEXS) ulih mantu bala penyereta ti deka ngiri penemu enggau pengelandik dikena nambahka penatai pemisi baka kus nganta, kus pengatur Homestay, kus OSH enggau mayuh agi kus ke bukai.
Program radio ‘Randau Digital Sarawak’ renggat kedua musin kedua, dikeluar ngena jaku Iban enggau Melayu dalam Rentak Ruai berengkah ari pukul 3 ngagai 4 lemai sereta Cats Drivetime pukul 5 ngagai 6 lemai.
Bala peninga CatsFM ulih ninga Randau Digital Sarawak tu sebulan sekali berengkah ari bulan April ngagai September 2019 kelimpah Info Kapsul ti diatur SMA enggau kerejasama Azam Sarawak ulih didinga ninting hari di CatsFM.
Program tu diatur raban ari Azam baka Nurfadzalina Ali, Pemesai Pemansang Komunikasyen (Bagi Iban) enggau Hassnal Hakim Junaidi (Bagi Melayu) begulai enggau bala temuai ti nyadi pengari ari SMA iya nya Contesa Muat, Akauntan Unit Pekara Wang SMA, Felicity Anai, Pemesai Pekara Undang-undang SMA, Dulcy Pani, Pemesai Pengawa SMA, Prof Khadir bagi Iban sereta Abang Nashiq bagi Melayu.
