SYLVESTER RIANG
Suarasarawak.news@gmail.com
KUCHING: Berekat ransing betanya ngagai bala pengajar, siku nembiak Sekula Sekondari (SMK) Julau, Irbelinna Gendol Joshua mujur bulih 8A, 1B ba peresa Sijil Pelajaran Malaysia (SPM) 2024.
Iya madah, lebuh belajar dalam kelas, iya suah betanya ngagai bala pengajar nyema enda mereti pasal topik ti dipelajar.
“Pia mega, muak ke malam, aku nandu baru topik ti dipelajar dalam kelas sereta ngaga not pandak ngambi muntang dikeingat sebedau ngereja pengawa bukai.
“Aku pechaya ngagai Tuhan lalu minta embing Iya lebuh belajar kelimpah nanggam pemanah kaul enggau bala pengajar, diri sebilik sereta bakih.
“Sebedau tu, aku udah melaba ke diri bulih pemutus nyulut laban aku ngelala tikas pengulih diri,” ku iya seraya beterima kasih.
Irbelinna madah, iya gaga amat ati lebuh mujur bulih pemutus peresa ti nyulut kelimpah ulih ngemegahka apai indai iya ti bela niki atas panggau maya ngambi pemutus peresa nya tadi.
Iya deka nampung pelajar ngagai renggat universiti ngambi kus nyadi pengajar tauka kus berubat dikena nyapai juluk diri.
Ku lalau iya, bala nembiak ti deka ngambi peresa SPM taun tu patut belajar bebendar, nyikap diri tumu lalu anang pechaya ngagai utai ti enda nyengala.
