MARUDI: Premier Sarawak, Datuk Patinggi Tan Sri Abang Johari Tun Openg muji rayat ba menua tu ti bela ‘bekayuh saum sebuah perau enggau perintah’.

Ku iya, rayat ba menua tu bekayuh segulai sejalai enggau perintah lalu beserakup ba bemacham pengawa enda ngira ba sukut main asal tauka pekara pemansang.

“Tu enda nyalah baka kitai ti belumba perau, lebuh bekayuh, kayuh kitai nya tadi meseti sebaka laban enti enda pia kitai nyau baka ti belaban enggau pangan diri ngujung ke perau kitai karam.

“Tang ba menua kitai diatu, berengkah ari lumba perau nyentuk main asal bansa kitai ba Sarawak tu chukup manah maya kitai bejalaika pengawa,” ku iya.

Abang Johari mansutka jaku nya rambau bejadi Program Regata Baram ba Padang Marudi ditu, sehari tu.

Ku iya, kelai penyerakup nya patut disema baka pengayuh perau ti meseti bisi rentak.

“Kitai rayat Sarawak bisi ba rentak nya, rentak kitai iya nya Sarawak First.

“Tu ti meri pelasar ngagai raban tuai ba menua tu ngatur pemansang ti ulih dipeda kita udah nyadi ba selampur nengeri,” ku iya.

Iya ti mega Chairman Gempung Parti Sarawak (GPS) madah, pengerami regata ukai semina mantaika main enggau adat asal aja tang bela mantaika sebuah ruang bilik ti besai.

“Nyentuk tuai perintah muji penyerakup menua kitai lebuh iya meda kitai bebasaka pangan diri, ari nya jaku ‘Segulai Sejalai’ diangkat ba selampur Malaysia nyadi kelai penyerakup,” ku iya.