Rayat enda ulih dikemula

KUCHING: Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit, Datuk Seri Fatimah Abdullah madah, perambu ngubah Perkara 16 Konstitusyen Sarawak baka diperambu Datuk Idris Buang deka diperati dulu.

Ku iya, enti pekara tu ulih nyamin pengelikun enggau pengelantang semua pia, kitai deka beratika pematut konstitusyen nya diubah.

Kitai sedarka pekara tu dibantai berindik ari kes ex-Adun Pujut apin lama ke udah ti muka runding sekeda piak merambu bemacham pekara bukai nipakka utai ke nyadi kemaya hari.

“Ubah tu nitihka peminta enggau nangkup ubah kemaya hari ke alai enti deka dipilih nyadi pengari rayat ba sebarang sitak mega begunaka peranak asal dia empu.

“Kebuah pia laban semina sida tu aja meretika penanggul, peminta ekonomi, pelajar enggau pekara pengelantang rama rayat dia.

“Enti disebutka pekara Adun Pujut, ba penemu aku empu, sempama baka mayau ke ngelamun tai, rayat tetap deka nemu pekara ke amat taja iya peranak asal menua nya,” ku iya.

Fatimah mansutka jaku tu lebuh dirandau pemberita pengudah ngabas taba baru Taska Qaseh ditu, tadi.

Suara Sarawak