KUCHING: Pemansang projek Transit Aliran Autonomi (ART) ukai masau duit, ku Premier Sarawak, Datuk Patinggi Tan Sri Abang Johari Tun Openg.
Iya madahka tuju projek ART tu dikena ngemaruka sistem perengka pengangkut mensia mayuh ngambi lantang enggau likun agi maya mindah.
“Taja pia, agi bisi sekeda ngansak kami ngetuka projek tu, kumbai sida masau duit.
“Kitai enda masau duit, tu pengawa meranakka puku ti diperambu dikena meri pemaik ngagai rayat nengah nentuka mobiliti ti manah agi jemah ila,” ku iya.
Abang Johari nibarka jaku nya ba Forum Mengeri Sarawak 2.0 (SUF 2.0) , ti diatur ba Hikmah Exchange, ditu, ensanus. Iya bisi bekunsika penemu ari Mandal Canselor Universiti Malaysia Sarawak (UNIMAS), beratika pejalai pulai mansang entara Kuching enggau universiti nya deka muntang agi.
“Pemisi jalai alternatif nengah Jematan Sejingkat, timpuh pejalai ngagai universiti udah dikurangka urung 25 minit,” ku iya.
Iya mega beratika arus trafik ari kandang menua baka Samarahan, Batu Kawa, Siburan enggau Bau nuju mengeri Kuching semampai sekut. Ku iya, nya berindik ari rega rumah dia ti murah agi enti dibanding rumah ba kandang menua Kuching empu.
“Timpuh pejalai urung 30 minit enti infrastruktur jalai alun enggau perengka pengangkut mensia mayuh efisyen.
“Nya alai, perintah ngemayuhka pemansang infrastruktur sereta ngena perengka pengangkut mensia mayuh nyengkaum ART dikena ngemuntangka pejalai rayat,” ku iya.
Abang Johari madah, mensia mayuh ulih merambu pejalai sida enti servis perengka pengangkut mensia mayuh tu belabuh dipejalai ila.
“Nitih penerang ti dipadah, ART deka datai ba tetiap stesyen ninting 15 minit.
“Tu ngasuh mensia mayuh ulih merambu pejalai sida enggau lebih efektif,” ku iya.
Berebak enggau nya, Abang Johari beratika pemansang sistem ART ba kandang HEEC berundingka sejarah perengka pengangkut ba Sarawak, laban palan nya kala endur stesyen kerita api keterubah nengeri tu.
“Seraya ngemansangka sistem perengka pengangkut ti moden tu, kitai mega deka nyaga pesaka budaya kitai,” ku iya. – ZAHID ZAKI
