SARIKEI: Kerejasama enggau sukung tegut beguna amat nentuka langgur pemansang perintah dipegai GPS lanchar sereta ngemai pemaik ngagai rayat.
Kaban Parlimen Tanjung Manis, Yusuf Abd Wahab madah, perintah deka seruran negika pengawa nyaga pengelikun enggau pengelantang semua rayat.
Taja pia ku iya, sekeda pemansang enda ulih dirumban laban begunaka timpuh sereta berundingka pekara bukai.
“Nya kebuah rayat patut liat ati nganti sereta meri kerejasama nentuka genap langgur pemansang ulih dipejalai enggau mujur sereta lanchar.
“Sida mega patut besaup enggau kitai lalu enda mantaika sebana ba media rama laban ulah baka tu semina ngasuh kitai saru penemu sereta charut, nadai pulaika pemanah,” ku iya lebuh bejaku ba mua mayuh rambau Program Kaul Lantang Gawai di Dewan Komuniti Kampung Kerubong ditu kemari.
Pia mega ku Yusuf, penanggul tau dibantai nengah chara ti patut sereta betul nentuka nadai piak beambi ulih.
Iya mega madahka agih belanja Projek Mit Pemansang Menua Pesisir (RTP) 2020 penyampau RM900,000 dikena bejalaika mayuh bengkah projek di sitak Kerubong enggau Kerapa.
Entara projek tu iya nya melakin jalai ngelawa Rumah Mambang Mek (Kerapa), nangkir laman mua enggau ujung bilik Rumah Jawa Sungai Kerubong, nyeleti jalai ngelawa Rumah Prada Kerapa, nyambung batang paip besai ngagai Rumah Manggang sereta ngaga padang futsal Rumah Jawa.
Menteri Muda Perambu Mengeri, Pengatur Tanah enggau Rampa Menua, Datu Len Talif Salleh mega bisi datai ngulu pengerami nya.
