KUCHING: Rayat Sarawak entara penerima pemadu mayuh ungkup Anugerah Benang Emas Hasanah (HGTA) 2024 pengudah bulih 11 ari 18 Anugerah di Kuala Lumpur, empai lama.

Ungkup Anugerah Emas Hasanah (Anugerah Penyulut Sepanjai Idup) udah dipenggi Adiguru Ngot Bi ti beumur 92 taun.

Iya mega udah menang Anugerah Tradisional Pemadu Nyulut ungkup kategori anyam.

Nitihka penerang Yayasan Hasanah, iya udah diaku nyadi Adiguru Kraf Menua ari Kraftangan Malaysia enggau ‘Living Legend’ ari Perintah Sarawak.

“Anugerah Emas Hasanah tu dikena meri basa ngagai sida ti udah nempa penyulut besai ngagai pesaka tekstil menua,” terang iya.

Pia mega, dua da rayat Sarawak ti bulih dua anugerah tambah iya nya Helen Manjan Atong, 66 enggau Nor Haimah Mohammad, 22. Seduai udah bulih Anugerah Emas Kelestarian enggau Anugerah penyulut Nembiak.

Kelimpah Anugerah Tradisional Anyam, rayat Sarawak mega bulih Anugerah Nyulam Tradisional Pemadu Nyulut iya nya Dr June Ong, Ong Wan Fen enggau Syamimi Razali.

Ong Wan Fen enggau Syamimi Razali mega bulih Anugerah Pengawa Ngaku Khas Nyulam.

Seraya ungkup Anugerah Tradisional Ikat sereta Anugerah Inovatif Nero enggau Chap udah diberi ngagai Ejah Jepon enggau Michael Lim Tiang Aik.

Adiguru Salbiah Muhi mujur nyadi champion ungkup Kategori Nyulam enggau Ngias Tradisional, seraya Mohamad Zulkifli menang Anugerah Inovatif Nyulam enggau Ngias. The Ranee x Biro Wanita Kerapa Spak enggau The Ranee x Biro Wanita Rian Batang bela nerima anugerah Inovatif Pemadu Nyulut enggau Pengawa Ngaku Khas ungkup Kategori Anyam.

Berebak enggau nya, Juliana Embrose dipadu nyadi pemenang Anugerah Tradisional Pemadu Manah Kereja Manik enggau Ina Sendar menang Anugerah Pengawa Ngaku Khas Kereja Manik.

Nangkan nya, Pahang nyadi pemenang ungkup tiga ari 18 kategori anugerah ditangkan Terengganu ti bulih dua anugerah enggau Sabah sereta Pulau Pinang bela bulih siti anugerah.

Nambah ke nya, Yayasan Hasanah madahka HGTA nya seraris enggau juluk ngambi ngangkatka identiti nasional nengah seni, pesaka enggau budaya Malaysia.

Seraya, Direktor Pengatur Pengawa Yayasan Hasanah Siti Kamariah Ahmad Subki madahka edisyen kedua HGTA tu nunjukka pengeran sida ngintu enggau ngelaku pesaka budaya Malaysia kelebih agi bemacham tradisi tekstil.

Iya madah, kelimpah ari 18 anugerah ti disua taun nyin tadi, taun tu sida udah nambahka dua anugerah baru iya nya Emas Penyulut Nembiak enggau Pemeruan.

“Tu dikena ngerami penyulut ba pengelandik sida seraya ngelaku identiti nasional ti ngemerat tanggungpengawa nembiak enggau chara pemeruan kami,” terang iya.

Nya kebuah ba timpuh dua taun ditumbuh, HGTA udah nunjukka pemesai guna nyadi segmen besai agenda nuju pengawa ngintu sereta besemekih ba sektor ekonomi kreatif.