KUCHING: Adun Saribas Mohammad Razi Sitam madah diri berasai sinu lebuh ngenang penusah ditapi mensia mayuh lebih agi peranak Dun Saribas ke gawa kontrak di mengeri Kuching jam ke diatu.
Kenu ku iya, sekeda sida nya gawa gaji hari, nyadi aku ngasai patut amat ngabas sida taja deriba kediri sekumbang Atur Tagang Pejalai (PKP) tu.
Ku Razi, sida bisi sebana putus penatai pemisi pengudah pengaji enda meri kereja sekumbang PKP tu.
“Ba penusah ke nyadi, sida bisi telefon ngagai aku lalu aku enda ulih nyebut enggai sereta enggau naka ulih, aku meseti betemu enggau sida.
“Aku meretika gaya gawa begaji hari laban aku empu kala ngasaika kereja tu lebuh agi biak suba.
“Kitai sama nemu, enti sida nadai kereja dia sida deka nadai gaji. Kekadang, makai enggau ngirup pan enda ulih, kelimpah enda ulih ngirumla belanja ngagai bala anak enggau bini ba menua.
“Nya alai, aku ngaga pemutus deka ngabas sida enggau nyuaka pemeri ke patut,” ku iya madah ngagai Suara Sarawak.
Taja pia, iya madahka diri gaga ulih limpang ngabas lalu mantu peranak Saribas ke agi ba Kuching lalu enda ulih gawa sekumbang PKP tu.
“Lebuh orang bukai diau ba rumah, aku enggau staf ari Palan Servis deriba kediri, ngiga sida ba endur gawa taja kami enda kala tama kia sebedau tu.
“Entara endur dilawa kami iya nya ba Moyan Jalai Batu Kawa, Jalai Ketitir, semak Wisma Bapa Malaysia, Medan Hamidah Jalai Bako, Mutiara Damai Jalai Sultan Tengah, Demak, Tabuan enggau endur bukai.
“Kami sebuat berasai gaga, laban sempat betemu enggau sida, pia mega penatai kami dikelalu sida enggau basa kelimpah lantang ati nerima bantu nya,” tandu iya.
