R&D pengulih kuasa gis  hidrogen majak dipejalai

KUCHING: Perintah Sarawak di baruh pegai GPS seruran ngemeratka pengawa pansik enggau pemansang (R&D) ngambika nempa teknologi kemaya hari dikena nyungkak ekonomi jemah.

Kepala Menteri Datuk Patinggi Abang Johari Tun Openg madah, Perintah Sarawak ngemeratka R&D kenyau ari taun 2017.

“Nya alai, perintah deka nyendiaka belanja dikena bejalaika R&D laban kitai bisi pemansut ti ulih dikemansang baka ai.

“Ai tu datai ari hidrogen enggau oksigen. Dua bansa gis tu ulih dipansut ari ai nengah proses elektro-kimia ke dikumbai elektrolisis.

“Nya kebuah kitai ulih mansutka sebansa produk ti berega,” ku iya lebuh bejaku bejadika stesyen pemansut enggau ngisi hidrogen sereta entukar ngena kuasa hidrogen keterubah ditu kemari.

JULUK NYADI NYATA… Abang dikemata bala bukai ngujika kerita ti ngena kuasa hidrogen.

Sarawak ngembuan mayuh pemansut ai baka tekat ai, ukai semina ulih mansutka kuasa karan ari hidro tang mega ulih diangkat nyadi produk bukai baka hidrogen.

“Kitai udah berengkah bejalaika pansik dipejalaika Sarawak Energy Berhad (SEB) begulai enggau SEDC lalu sehari tu (ensanus) kitai ngelancharka iya (hidrogen),” ku iya nerang.

Ngelansa pasal pekara nya, ku Abang Johari, baka selama mayuh piak deka mantah taja mayuh pemansut bukai mudah agi.

“Kitai tau beratika pekara ke sama lebuh rega telefon dalam taun 1980-an ti mar amat, manggai RM8,000.

“Tang tebal agi sida milih ngena telefon nyengkaum aku empu taja rega mar. Diatu kitai ulih meli telefon rega RM300,” ku iya seraya madah sebarang pemansut baru endang tinggi rega tang majak mudah pengudah teknologi betambah manah.

“Pengudah beratika pengulih tu, kitai deka nyilih kuasa nuklear ngena hidrogen.

“Kitai ulih nambahka penatai pemisi sereta nyungkak ekonomi Sarawak timpuh ke panjai pengudah kitai eksport hidrogen ngagai menua bukai,” ku iya nambah.

Pia mega ku Abang Johari, kuasa hidrogen bisi pengulih besai laban Sarawak bisi pemansut ai ti mayuh enda baka pemansut kuasa ari fosil ti nemu abis.

“Tu meh pekara dikedeka kitai, nukar ai nyadi pemansut ti ulih dikena baru, meri pengelebih ngagai rayat menua tu,” ku iya nampung.

Sama datai Sapit Kepala Menteri Tan Sri Datuk Amar James Jemut Masing, Menteri Utiliti Datuk Sri Dr Stephen Rundi Utom, Menteri Muda Elekterik Menua Pesisir Dr Abdul Rahman Junaidi, Chairman SEDC Tan Sri Datuk Amar Dr Abdul Aziz Datuk Hussain enggau Chairman Sarawak Energy Berhad Datuk Amar Abdul Hamed Sepawi.

Suara Sarawak