Rebak baru diperansang nyadi kaban Kelab Gagung Saratok

SARATOK: Mensia mayuh lebih agi bansa Iban ke nguan pelilih menua tu diperansang ngambika terus chakah ngetan adat, kereban, pekayan enggau main asal.

Chairman Raban Kelab Gagung Saratok John Jelema madah, nembiak rebak baru endang disagi sereta dikelalu masuk nyadi kaban Kelab Gagung Saratok).

Iya madah, peminta nyadi kaban endang semampai dibuka lalu bisi dipinta mayar panjar RM 60.

Bayar tu mungkur panjar nyadi kaban RM 10 ungkup nyadi kaban SDNU Saratok lalu RM 50 panjar nyadi kaban Kelab Gagung Saratok.

“Tuju penumbuh gerempung tu ngambika pekayan asal Dayak (Iban) terus diintu meruan, enda punas ngapa baka baju burung, baju kebat enggau kereban ngepan Iban ke bukai,”ku iya.

Ku iya, naka tu Kelab Gagung SDNU Saratok bisi 52 iku kaban kenyau ditumbuhka lalu mujur berejista ba ROS kenaka 25 June 2017.

“Kelab tu bisi perengka gendang enggau tabuh kelimpah ari tabuh ajat, gendang rayah, tabuh ngambat pengabang enggau gendang pampat,

“Mayuh bansa tabuh gendang enda sama reti tang bisi selepak ba pun tuju pengawa enggau rentak palu,”ku John maya dirandau pemberita apin lama ke udah.

Nangkan nya ku iya, Gagung tu siti ari pekayan ngepan bansa Iban ke pemadu tinggi tikas ari semua ripih ngepan kitai Iban.

“Laban Gagung enda dipasukka orang ngapa maya jeman kelia, enti ukai ba pengawa ti bisi bekait enggau pengawa bujang berani baka Gawai Antu, Gawai Kenyalang (Gawai Burung), Gawai Sandau Ari sereta Gawai ke tinggi agi dikumbai Gawai Niri Tiang Antu Gerasi.

“Mayuh mega tuju reti bukai ti bisi besangkut paut enggau Baju Gagung,

“Jeman kelia, enti maya siku-siku mensia (anak Iban) udah ngangkat ke diri bujang tang enti nadai ngembuan baju Gagung, dia iya enda tau tauka apin ulih sama nyereta orang nurun ngayau,”tandu John.

Nangkan nya, tu meh kebuah Kelab Gagung SDNU Saratok tu ditumbuh ngambika semua pesaka pekayan kereban enggau main asal bansa Iban bisi dipeda sereta ditemu bala nembiak rebak baru dudi.

Nya alai ngagai mensia mayuh ti bisi ati deka masuk nyadi kaban Kelab Gagung SDNU Saratok tau betanya terus nuju John ba lumur 014-5745643.

Suara Sarawak