KOTA SAMARAHAN: Pengawa ngajat ukai semina beguna lebuh pengerami Hari Gawai aja tang bela beguna dikena ngelaluka temuai dipebasa lebuh ngatur program enggau pengerami besai.

Pemungkal Gerempung Dayak Bukit Kelingkang (DBK) Pampang Melikin, Victor Ason madah, nembiak Iban rebak baru patut nguasa ajat lama enggau manah kenyau sida agi mit.

“Budaya nya patut diturun ke kitai berengkah ari diatu ngagai rebak baru ngambi ajat bansa kitai tu enda punas sereta padam ditelan pemansang.

“Nya alai, aku enggau gaga ati mantaika ajat kitai ngagai orang luar di sebarang endur dikena mandangka ajat Iban ngagai sida,” ku iya ba sebengkah penerang pemberita, kemari.

Iya madah, ajat lama endang udah segulai enggau raban bansa Iban di Sarawak sereta nyadi kelai pengelala dikena nyamin idup beserakup kelimpah ngintu pesaka asal enggau seni Sarawak.

Nangkan nya, Pengajar Main Asal Dayak Bumi Kenyalang (KDBK), Korea Musit madahka ajat nya nyadi pesaka lama ti beguna dikena ngetan enggau ngangkatka pengelala bansa Iban.

Kena 9 November tu tadi, DBK Pampang Melikin bisi datai mantaika ajat Iban ngagai mensia mayuh di Balai Gerempung Pengarap Wat Maha Boddhi di Samarindah Baru.

Rambau program nya, gerempung tu mantaika mayuh bengkah ajat asal baka Ajat Ngelalu Temuai, Ajat Pua Kumbu, Ajat Atas Chapak, Ajat Lelaki enggau Ajat Indu.