KUCHING: Band rock tebilang menua, Amuk deka ngerichah Karnival Gawai REDEEMS Ke-18 ke diatur ari 16 ngagai 18 Julai ila di Kampung Budaya Bidayuh @ REDEEMS di Bau.
Presiden REDEEMS, Datuk Peter Nansian madah, pemerindang khas ari Amuk nya mega deka ngerichah pekit REDEEMS Battle of the Bands (BOTB) 2026, ti nerima band muzik ari selampur Sarawak enggau Sabah, nyengkaum Kalimantan Barat, Indonesia.
Nya alai ku iya, program serimbai Karnival Gawai REDEEMS Ke-18 nya mega deka ngempuruka bala pemuzik bepenau, orang ti rindu ke muzik., pemekuh budaya sereta peranak menua ba program tiga hari mandangka muzik, budaya enggau pesaka.“
Tu edisyen keempat lalu REDEEMS Battle of the Bandsterus nyadi panggau ngiga enggau mantai penau muzik lokal.“Kelimpah ari nya, tu mega meri peluang ngagai raban muzik ti bisi ati mandangka kreativiti, pengelandik merindang enggau pengerindu sida ngagai muzik,” ku iya ba aum media, ditu, kemari.
Nerang silik, Peter madah ke pekit ngena rambai jaku “Rock & Blues”, dia bala band muzik ari selampur Borneo ti deka bepekit ngerebut gelar champion enggau perais mata duit RM10,000.
Berindik ari nya, pengawa rejister udah dibuka diatu lalu band ke bisi ati bepekit diperandang rejister sereta meda pelasar media sosial rasmi REDEEMS Battle of the Bands ngulihka penerang pemadu baru.
Iya mega madah, penyampau penyereta ditaga 20 band enggau idar pekit diatur ari 16 Julai seraya renggat kepenudi diatur 17 Julai.
Peter madah, karnival nya mega deka digulu Premier Sarawak, Datuk Patinggi Tan Sri Abang Johari Tun Openg kena 18 Julai. – NICK FLETCHER
