SRI AMAN: Opis Menteri Betanam Betupi enggau Jamin Pemakai kemari mantaika rega lantai padi ditetapka ngagai RM1,300 per tan metrik di Sarawak enggau Sabah belabuh 15 Februari tu.
Pekara nya udah dibantai Menteri Betanam Betupi enggau Jamin Pemakai, Datuk Seri Mohamad Sabu ba pejalai nemuai seraya gawa pengelama tiga hari ke Sarawak.
Sama nyempulang Mohamad iya nya Sapit Menteri Betanam Betupi enggau Jamin Pemakai, Datuk Arthur Josep Kurup.
“Seraris enggau juluk KPKM nambahka pemansut berau menua, pengawa nyebela rega minimum dijamin ba Sarawak sereta Sabah sebaka enggau Semenanjung ulih nyukung industri padi enggau berau ngambi terus meruan enggau beretan.
“Pengawa netapka rega lantai padi di Sarawak enggau Sabah deka belabuh tengan bulan Februari tu ulih nambahka penatai pemisi orang bumai.
“Nengah rega tu, udah tentu tu meransang orang bumai nambahka pemansut padi,” ku iya nyemetak.
Mohamad mansutka jaku nya ba aum pemberita lebuh Pejalai Nemuai Seraya Gawa ke Projek Gelumbang Padi Nengeri Sarawak ba Balai Nangkai, Stumbin, Sri Aman, ditu tadi.





