Rentayan penyambung selatan-utara

BINTULU: Projek Jematan Kuala Kemena di entara pengawa ditampung Perintah Sarawak di baruh pegai Kepala Menteri Datuk Patinggi Abang Johari Tun Openg enggau Perintah Gabungan Parti Sarawak (GPS).

Menteri Muda Jalai Pesisir Datuk Haji Julaihi Haji Narawi madahka jematan meraka Kuala Kemena ke mengeri Bintulu nyadi sebagi ari rentayan jalai tebing tasik ti diperambu.

Projek tu mega dipejalaika Perintah Sarawak dikena nyendiaka rentayan sistem penyambung ti lantang agi ngagai peranak menua enggau kandang ngelingi nya.

Kelimpah ari nya ku iya, tu mega sebagi ari penyikap ngagai rentayan jalai tebing tasik ke bisi diatu ke alai jam enggau takah pejalai deka pandak agi.

Projek tu disadang ulih meri awak enggau ‘seput’ baru enggau ‘kedap’ pemansang sekampur kandang tebing tasik ari selatan ngagai utara menua tu kelebih agi di Bagi Menua Bintulu.

Iya mansutka jaku tu rambau pengawa Nasih Tanah Jematan Kuala Kemena Jepak, ditu, lemai kemari.

Kelai pengawa bejadi udah dipenyadika Kepala Menteri Datuk Patinggi Abang Johari Tun Openg.

Julaihi andal amat empas ari projek jematan nya ila bela deka diasai serap menua tu lalu ukai semina kandang menua Jepak enggau besemak aja.

Jematan beungkus RM467 juta tu ngembuan setail langkar baka ‘cable stayed’ nyauka ngambi gamal Golden Gate Bridge ti bisi di menua di San Francisco kelimpah bisi empat lupak jalai.

Tambah mega, projek jematan tu ditimpuh tembu kandang 48 bulan tauka empat taun.

NARIT ATI… Setail langkar Jematan Kuala Kemena baka ‘cable stayed’ nyauka ngambi gamal Golden Gate Bridge di San Francisco.